Қозоғистон президенти Қасим-Жомарт Тоқаев иқтисодчиларнинг мамлакат «ўрта даромад тузоғи»га дуч келгани ҳақидаги фикрини қўллаб-қувватлади. Бу ҳақда у 4 май куни Олмаотада бўлиб ўтган Сунъий интеллектни ривожлантириш кенгаши йиғилишида айтиб ўтди.

«Қозоғистон классик «ўрта даромад тузоғи»га дуч келгани ҳақидаги экспертлар фикрига қўшилиш лозим. Бунда ресурс ва арзон ишчи кучи каби анъанавий ўсиш манбалари тугаш арафасида, янгилари эса ҳали тўлиқ шаклланмаган ва ишга туширилмаган. Иқтисодий турғунликнинг олдини олиш мақсадида кенг кўламли платформавий ечимларни шакллантириш орқали рақамли иқтисодиётга ўтишни таъминлаш зарур», — деди Тоқаев.

Қозоғистон раҳбари давлат маълумотларининг ягона тизимисиз сунъий интеллект самарасиз бўлиб қолишини таъкидлади. «Шу муносабат билан давлат хизматларини ортиқча бюрократик талабларни бартараф этадиган кўринмас, аммо ўта самарали операцион тизимга айлантириш зарур. Анъанавий тизимда сўровни қабул қилишдан тортиб, у бўйича қарор қабул қилингунга қадар бўлган йўл бир неча кун, ҳатто ҳафталарни ташкил этади. Идеал ҳолатда бу цикл бир неча сониягача қисқартирилиши керак, бу эса бутун мамлакат миқёсида капитал айланишининг кескин тезлашишини таъминлайди», — дея қўшимча қилди у.

Тоқаев, шунингдек, дунё лабораторияларининг ривожланган ва ривожланаётган иқтисодиётлар ўртасидаги фарқ шиддат билан ўсиб бораётгани ҳақидаги маълумотларига тўхталиб ўтди.

«Сунъий интеллект капитал ва технологияларнинг жаҳон етакчилари қўлида тўпланишига олиб келиб, ўз вақтида ва қатъий тартибга солувчи аралашувсиз енгиб бўлмайдиган «технологик узилиш»ни юзага келтирмоқда. Бу Қозоғистон учун сигналдир. Реал интеллектуал ечимларни ишлаб чиқишдаги имкониятларимиз ҳақида аниқ тасаввур ва тушунчага эга бўлиш учун мавжуд вазиятни синчиклаб ўрганиш зарур», — деди у.

  • 2026 йил апрель ойи охирида Қозоғистон бош вазири Олжас Бектенов давлат органларига мамлакат иқтисодиёти ривожланишини прогноз қилиш учун сунъий интеллектни жорий этишни топширганди. Унинг таъкидлашича, дунёдаги ҳозирги вазият «режалаштиришнинг янада аниқроқ воситаларига» ўтишни талаб қилмоқда, сунъий интеллект эса «катта ҳажмдаги маълумотларни қайта ишлаш, қонуниятларни аниқлаш ва янада аниқ прогнозларни шакллантириш» имконини беради.