Токиода Япониянинг пацифистик Конституциясини ўзгартириш бўйича ҳукумат уринишларига қарши ўтказилган митингда 50 мингга яқин киши иштирок этди, деб хабар бермоқда Guardian. Акция 3 май — Конституция кунида бўлиб ўтди.
Бош вазир Санаэ Такаичи ўтган ҳафта Вьетнамга ташрифи чоғида мамлакат асосий қонунини қайта кўриб чиқиш бўйича «кенгайтирилган мунозаралар» ўтказишга чақирганди. Унинг сўзларига кўра, Иккинчи жаҳон уруши якунланганидан сўнг Япония оккупацияси даврида АҚШ маъмурияти томонидан ёзилган Конституция «замон талабларига мувофиқ вақти-вақти билан янгиланиб туриши керак».
Такаичи ва ҳукмрон Либерал-демократик партия консерватив қанотининг бошқа вакиллари анчадан бери тузатишлар киритишга чақириб келмоқда. Уларнинг фикрича, амалдаги ҳужжат Япониянинг Шимолий Корея ва Хитой томонидан кучайиб бораётган хавфсизлик таҳдидларига жавоб бериш имкониятларини чеклайди. Хусусан, улар Японияга халқаро низоларни ҳал қилиш учун ҳарбий куч ишлатишни тақиқловчи 9-моддани ўзгартиришни таклиф қилмоқда.
Конституцияга ҳар қандай ўзгартириш киритиш учун Япония парламентининг ҳар икки палатасида учдан икки қисм овоз ва умуммиллий референдумда оддий кўпчиликнинг розилиги талаб этилади.
Янги сўровномалар аҳолининг катта қисми Конституцияни қисман қайта кўриб чиқишни, жумладан, кучларининг ҳуқуқий мақомини тан олишни қўллаб-қувватлашини, бироқ урушдан кейинги Япония пацифизмининг тубдан ўзгартирилишига қарши эканини кўрсатмоқда.
Япониянинг амалдаги Конституцияси 1947 йил 3 майда кучга кирган. Ўшандан бери у бирор марта ҳам ўзгартирилмаган.
20 апрель куни Токиода 36 мингга яқин киши Япония парламенти биноси олдига чиқиб, Конституциянинг 9-моддасини сақлаб қолишни талаб қилганди.
