Тошкент — Самарқанд йўналишида янги тезюрар темирйўл қурилиши лойиҳасининг техник-иқтисодий асоси (ТИА) тайёрланди. Бу ҳақда 5 май куни Самарқандда ОТБ йиғилиши доирасида транспорт вазири ўринбосари Жасурбек Чориев маълум қилди, деб хабар бермоқда Gazeta мухбири.
Унинг сўзларига кўра, 28 апрель куни Жанубий Кореянинг Saman Engineering компанияси томонидан тайёрланган ТИАнинг сўнгги версияси тақдим этилган.
«Аммо саволлар бор, Молия вазирлиги билан биргаликда, эҳтимол, бошқа маслаҳатчи билан ҳам баъзи ишларни қайта кўриб чиқишимиз керак», — деди у.
Вазир ўринбосари таъкидлашича, лойиҳанинг техник қисми тушунарли, бироқ ҳужжатни инвестицион жозибадорлик нуқтаи назаридан янада такомиллаштириш талаб этилади.
«Техник жиҳатдан, ҳа, тушунарли. Лекин уни инвесторлар учун жозибадор қилиш, уларни жалб этиш учун лойиҳадаги жозибадор жиҳатларни ажратиб кўрсатишимиз, қайси участкаларда, қайси объектлар ва инфратузилмада инвесторларни жалб қилиш мумкинлигини ҳамда улар учун нима қизиқарли бўлишини аниқ белгилашимиз керак. Шу жиҳатдан ҳозир яна бироз ишлашимиз керак», — деди Жасурбек Чориев.
Унинг сўзларига кўра, Транспорт вазирлиги ҳозир Жаҳон банки билан лойиҳага қисқача шарҳ бериш ва уни валидация қилиш учун маслаҳатчи жалб этиш имкониятини муҳокама қилмоқда.
«Ҳозир Жаҳон банки билан гаплашяпмиз, эҳтимол, маслаҳатчи жалб қилиб, қисқа ревью (шарҳ) ва валидация ўтказамиз. Шундан кейин тендер жараёнига ўтамиз», — деди у.
Қурилиш ишлари жорий йилда бошланадими, деган саволга вазир ўринбосари буни амалга ошириш қийин бўлишини билдирди.
«Бу жуда қийин, деган бўлардим, чунки ТИАни рекорд даражада қисқа муддатда тайёрладик. Бу жуда мураккаб лойиҳа. Тошкент — Самарқанд ва Тошкент — Андижон пулли йўллари билан солиштирганда, бу босқичда жуда тез ишладик, чунки гуруҳ ишлади, ҳокимликларни жалб қилдик, ҳар бир томон ўз қисми бўйича маслаҳат берди», — деди Чориев.
Лойиҳа ҳақида
Ўтган йилнинг сентябрь ойида президент Шавкат Мирзиёев Тошкент — Самарқанд ва Самарқанд — Навоий — Бухоро йўналишлари бўйлаб тезюрар поездлар қатнови учун янги темирйўл линияси қурилишини маълум қилган эди.
Техник-иқтисодий асос Корея компаниялари, жумладан, Saman Engineering, Dong Myeong Engineering Consultants & Architecture Co., Korea Railroad Corporation ва Korea National Railway консорциуми томонидан ишлаб чиқилган. Лойиҳа Кореянинг Эксимбанки гранти ҳисобидан молиялаштирилади.
Июль ойида транспорт вазири Илҳом Маҳкамов тендер ҳужжатларини тайёрлаш 2026 йилнинг январь ойида бошланишини маълум қилганди. Йўл қурилиши ҳам келаси йил бюджетига тахминий киритилган.
Янги тезюрар темирйўл Тошкентнинг янги халқаро аэропорти ва Самарқанднинг «юраги»ни боғлаши кутилмоқда. 2025 йил ноябрида Жанубий Кореянинг Saman Engineering компанияси учта йўналиш вариантини тақдим этганди.