Россия Мудофаа вазирлиги 4 май куни кечқурун РФ президенти Владимир Путиннинг қарорига биноан 8 ва 9 май кунлари «совет халқининг Улуғ Ватан урушидаги ғалабаси байрами шарафига сулҳ» эълон қилинишини маълум қилди.
«Украина томони ҳам ушбу ўрнакка эргашишига умид қиламиз», — дейилади баёнотда.
Вазирлик, шунингдек, агар Украина Москвада 9 май байрамини бузишга уринса, РФ Қуролли кучлари «Киев марказига жавоб тариқасида оммавий ракета зарбаси бериши» билан таҳдид қилди.
РФ Мудофаа вазирлигининг баёнотидан кўп ўтмай, Украина президенти Владимир Зеленский шундай деб ёзди: «Бугунги кунга қадар Украинага Россия ижтимоий тармоқларида эълон қилинаётган ҳарбий ҳаракатларни тўхтатиш тартиблари бўйича ҳеч қандай расмий мурожаат бўлмаган».
«Биз инсон ҳаётини ҳар қандай йилликни «нишонлаш»дан беқиёс даражада юқори қадрият деб ҳисоблаймиз. Шу муносабат билан 5 майдан 6 майга ўтар кечаси соат 00:00 дан бошлаб сукунат режими эълон қиламиз. Ушбу муддатгача бўлган вақт ичида сукунат қарор топишини таъминлаш реал вазифадир. Кўрсатилган вақтдан бошлаб биз ҳам мос равишда ҳаракат қиламиз», — деди Украина етакчиси.
29 апрель куни АҚШ президенти Дональд Трамп ва Владимир Путин ўртасида телефон орқали мулоқот бўлиб ўтганди. Оқ уй раҳбари Россия президентига 9 майга қадар Украинадаги урушда «кичик ўт очишни тўхтатиш»ни эълон қилишни таклиф этганини маълум қилди. Кремль эса, ўз навбатида, Путин Трампга байрам муносабати билан сулҳ эълон қилишга тайёрлиги ҳақида маълумот берганини билдирди.
