Наманган халқаро аэропортининг янги йўловчи терминалини июнь ойи якунида очиш режалаштирилмоқда. Бу ҳақда 5 май куни Самарқандда ўтаётган Осиё тараққиёт банки Бошқарувчилар кенгашининг 59-йиллик йиғилиши доирасида транспорт вазири ўринбосари Жасурбек Чориев маълум қилди, дея хабар бермоқда Gazeta мухбири.
«Наманган — деярли тайёр… Ўйлайманки, июнь охирида [йўловчи] терминали тайёр бўлади», — деди у.
Вазир ўринбосарининг сўзларига кўра, лойиҳага хусусий шерик томонидан киритилган инвестициялар миқдори қарийб 70 млн долларни ташкил этган. Бу лойиҳа умумий қийматининг тахминан ярмига тенг.
Лойиҳа ҳақида
2025 йил сентябрь ойида президент Шавкат Мирзиёев Наманган вилоятига ташрифи давомида Наманган халқаро аэропортининг янги терминаллари қурилиши билан танишган эди.
Қиймати 140 млн доллар бўлган лойиҳа уч қаватли йўловчи терминали қурилишини кўзда тутади, бу эса йўловчи оқимини 2,5 бараварга ошириши керак. Бинода чегара ва виза назорати ҳудудлари, бизнес зал, савдо ва жамоат жойлари, тиббиёт пункти ҳамда duty free дўконлари бўлиши режалаштирилган.
Шу билан бирга, суткасига 50 тоннагача юкни қайта ишлаш ва 90 та давлатга экспорт қилиш имкониятига эга юк терминали ҳам қурилмоқда. Президентнинг сўзларига кўра, бу Фарғона водийсининг ягона карго тизимини шакллантиришга ҳамда минтақанинг экспорт ва транзит салоҳиятини оширишга хизмат қилиши лозим.
Лойиҳа, шунингдек, кейтеринг мажмуаси, ёнилғи қуйиш шохобчаси, махсус техникаларни янгилаш ва бошқа инфратузилма объектларини ўз ичига олади. Янги терминалларни 2026 йилда фойдаланишга топшириш режалаштирилган эди.
Аэропортни бошқариш кимга топширилди?
2024 йилда вилоят ҳокимлиги аэропортни давлат-хусусий шериклик модели асосида бошқарувга бериш ҳақида хабар берган эди. Келишув Namangan Air Solution компанияси билан имзоланган, бироқ тендер ўтказилгани ҳақида маълумот берилмаган.
Namangan Air Solution компанияси 2023 йил 26 майда Наманганда рўйхатдан ўтган. Асосий фаолият тури — ҳаво транспорти соҳасидаги хизматлар, устав капитали эса 2 млн сўмни ташкил этади.
Раҳбар сифатида Сардор Абдувахабович Хусаинов, ягона таъсисчи сифатида эса БААда рўйхатдан ўтган ME CA Overseas Investments DMCC LLC кўрсатилган.
Амирлик компанияси, шунингдек, Ўзбекистондаги бир қатор корхоналарда ҳам улушларга эга. Улар орасида Kattakurgan Sigma Cement цемент заводи, Djizzakh Sigma Cement цемент заводи, Djizzakh Solar Energy (Sigma Energy) электр станцияси, Djizzakh Cement монтаж компанияси бор.
Фарғона вилояти транспорт прокурори Илхомжон Акбаров шу йилнинг февраль ойида Вазирлар Маҳкамасининг 2023 йил 2 октябрдаги «Наманган халқаро аэропортини модернизация қилиш ва бошқариш лойиҳасини давлат-хусусий шериклик асосида амалга ошириш чора-тадбирлари тўғрисида»ги қарорига (ҳужжатни очиқ манбалардан топишнинг имкони бўлмади) асосан янги йўловчи терминали қурилиши жараёни билан танишди.
Қурилиш лойиҳаси Mukammal Project томонидан ишлаб чиқилган. Қурилиш ишлари Namangan Air Solutions МЧЖ қурилиш дирекцияси буюртмасига асосан Atlant компанияси томонидан олиб борилмоқда.
Янги йўловчи терминали биносининг қурилиш ости майдони 9886 кв. метрни, бинонинг умумий майдони эса 22634 кв. метрни ташкил этади. Терминал соатига 1200 нафар йўловчига хизмат кўрсатишга мўлжалланган.
Ҳозирги вақтда Namangan Air Solutions ўз маблағлари ҳисобидан янги йўловчи терминалида 180 млрд сўмлик қурилиш-монтаж ишларини амалга оширмоқда, дея хабар берган Транспорт прокуратураси.
Бундан ташқари, етакчи давлатлардан янги йўловчи терминали учун махсус асбоб-ускуналар ва техникалар — лифтлар, эскалаторлар, юкларни ташиш ленталари, интроскоплар ва бошқа жиҳозларни харид қилиш ишлари олиб борилмоқда.
Қурилиш ишларини якунлаш дастлаб 2026 йил сентябрь ойига режалаштирилган эди.