5 май куни соат тахминан 16:25 ларда Тошкентнинг «Чимган» савдо-кўнгилочар маркази яқинида Chevrolet Equinox автомобили чорраҳада светофорнинг қизил чироғида тўхтаб турган қатор машиналарга катта тезликда урилди. Ҳодиса акс этган кўплаб видеолар ижтимоий тармоқларда тарқалди.
Видеоёзувларда қора рангли автомобиль зарб оқибатида ҳавога кўтарилиб, бошқа машиналарнинг устига тушганини кўриш мумкин. Орқадан берилган кучли зарба оқибатида машиналардан бири йўлдан чиқиб кетиб, дарахтга урилган. Бошқа ҳайдовчилар жабрланувчига машинадан чиқишга ёрдам беришга ҳаракат қилган. Уларга ёрдам бериш учун қутқарувчилар етиб келган.
Ҳодиса жойига кейинроқ етиб борган Gazeta мухбири Equinox автомобили бутунлай пачоқ бўлиб кетганига гувоҳ бўлди. Ариқда турли машиналарнинг кузов қисмлари, шиналари ва салон деталлари сочилиб ётарди. Ободонлаштириш хизмати ходимлари эса дарахтларнинг синган шохларини йиғиштириб олаётганди.
Фото: Ижтимоий тармоқлар
Тошкент шаҳри ИИББ хабарига кўра, ҳодисага Equinox`нинг 73 ёшли ҳайдовчиси соғлиғи ёмонлашгани ва бошқарувни йўқотгани сабаб бўлган. У тос суяги ва чап елка синиши, бош мия ёпиқ жароҳати аломатлари билан шифохонага ётқизилган.
Шунингдек, бошқа транспорт воситаларининг ҳайдовчилари: 1968 йилда туғилган С.Э., 1971 йилда туғилган М.А., 1985 йилда туғилган С.Э. енгил жароҳат олгани сабабли уларга шифокорлар биринчи тиббий ёрдамни кўрсатган.
ЙҲХБ воқеа сабабли 15 та транспорт воситасига техник шикаст етганини маълум қилди. Ҳолат юзасидан ЙҲХБ томонидан суриштирув ҳаракатлари олиб борилмоқда.
Видео
Фото
