АҚШ президенти Дональд Трамп Ҳурмуз бўғозида қолиб кетган кемаларни озод қилиш бўйича бошланган «Озодлик лойиҳаси» операцияси «қисқа муддатга» тўхтатилишини маълум қилди.
Оқ уй раҳбари ўз қарорини Покистон ва бошқа давлатларнинг илтимоси, Эронга қарши кампания давомидаги «улкан ҳарбий муваффақиятлар», шунингдек, Теҳрон билан «тўлиқ ва узил-кесил келишувга эришиш борасидаги сезиларли ютуқлар» билан изоҳлади.
«Блокада ўз кучида қолар экан, келишувни якунлаш ва имзолаш имкони бор-йўқлигини аниқлаш мақсадида „Озодлик лойиҳаси“ қисқа муддатга тўхтатиб турилади», — деб ёзди АҚШ президенти Truth Social ижтимоий тармоғида.
Эрон давлат ОАВлари эса операциянинг тўхтатилиши «АҚШнинг ўз мақсадларига эришишдаги муваффақиятсизлиги»дан далолат беришини таъкидлади.
Трампнинг баёноти АҚШ давлат котиби Марко Рубио февраль охирида бошланган «Эпик ғазаб» операцияси ўз мақсадларига эришгани ва Вашингтоннинг эндиги устувор вазифаси Ҳурмуз бўғози фаолиятини қайта тиклаш эканлигини айтганидан бир неча соат ўтиб янгради.
«Биз [«Эпик ғазаб»] операцияси мақсадларига эришдик. Энди «Озодлик лойиҳаси»га ўтмоқдамиз», — деганди Рубио.
Давлат котиби «Озодлик лойиҳаси» мутлақо мудофаа характерига эга эканини таъкидлади. «Отишма бўлмайди, лекин агар бизга қарата ўт очишса, биз ҳалокатли тарзда жавоб қайтарамиз», — дея қўшимча қилди у.
4 майга ўтар кечаси Дональд Трамп Ҳурмуз бўғозида тўсиб қўйилган хорижий кемаларни озод қилиш операциясини эълон қилган эди. Унинг сўзларига кўра, АҚШга бундай илтимос билан «бутун дунё мамлакатлари» мурожаат қилган. «Биз ушбу давлатларни уларнинг кемаларини мазкур ёпиқ сув йўлларидан хавфсиз олиб чиқишимизга ишонтирдик», — деган эди ўшанда Оқ уй раҳбари. Эрон эса бунга жавобан бўғозга яқинлашган «ҳар қандай хорижий ҳарбий кучларга, айниқса, АҚШ армиясига» ҳужум қилиш билан таҳдид қилган.