Энергетика вазири Жўрабек Мирзамаҳмудовнинг молиячи ва блогер Отабек Бакировга нисбатан шикояти бўйича маъмурий иш тугатилди. Жиноят ишлари бўйича Яшнобод туман суди 7 майдаги мажлисда тегишли қарорни эълон қилди, дея хабар беради Gazeta мухбири.
Суд ёлғон ахборот тарқатиш моддаси бўйича жавобгарликка тортиш муддати ўтганини кўрсатди.
Суд қарорига кўра, иш Маъмурий жавобгарлик тўғрисидаги кодекснинг 36-моддаси инобатга олинган ҳолда ҳамда ушбу кодекснинг 271-моддаси 7-бандига асосан — маъмурий жавобгарликка тортиш муддати ўтганлиги муносабати билан тугатилган.
Энергетика вазирининг шикояти Бакировнинг метан заправкаларидаги газ таъминоти ҳолати, навбатлар ҳамда АГТКШларда газ мавжудлиги ҳақида маълумот берувчи сервис сифатида тақдим этилган Авто24 иловасининг фаолиятига оид нашрларига тааллуқли эди.
Аввалроқ Бакиров вазирнинг олдинги аризаси бўйича жиноят иши қўзғатиш рад этилганидан сўнг, унинг 2024 йил 26 декабрда Тошкент шаҳар ИИББга янги шикоят билан мурожаат қилганини маълум қилганди. 2026 йил 23 январда ИИББ жиноят иши қўзғатишни рад этиш тўғрисида қарор қабул қилган, бироқ 25 март куни пойтахт прокуратураси бу қарорни бекор қилган. Шундан сўнг материаллар кейинги кўриб чиқиш учун Яшнобод тумани ИИБга юборилган.
Отабек Бакировнинг ўзи вазирлик ҳаракатларини босим деб ҳисоблади. У журналистларга берган интервьюсида шундай деди:
«Энергетика вазирининг иши йўқдек, кетма-кет ариза бериши тушунарсиз. Агар шунақа энергияси бўлса, уни энергетик барқарорлик, етишмовчилик учун сарфласин. Менинг овозимни ўчириш учун, гапирмасин, муаммони кўтармасин деб, вазирликнинг инсон ресурсларини, маъмурий ресурсларини сарфлаяпти. Шунча ИИБ ходими овора, прократура, суд, экспертиза овора», — дейди Бакиров.
Отабек Бакиров — молиячи ва Telegram канал муаллифи бўлиб, у ўз каналида иқтисодий сиёсат, энергетика, тарифлар, субсидиялар, давлат компаниялари ва регуляторлар фаолияти масалаларини мунтазам шарҳлаб боради. Унинг нашрлари кўпинча жамоатчиликда баҳс-мунозараларга сабаб бўлади.
Ушбу иш сўз эркинлиги, амалдорларни танқид қилиш ҳамда давлат органлари ҳаракатларини оммавий баҳолашнинг чегаралари борасидаги муҳокамалар давом этаётган бир пайтда кенг акс-садо берди. Бир қатор журналистлар, блогерлар ва жамоат фаоллари амалдорлар танқидга суд тортишувлари билан эмас, балки фактлар ва тушунтиришлар билан жавоб бериши кераклигини таъкидлади.