Ўзбекистонлик гроссмейстер Жавоҳир Синдаров Польшада ўтаётган Super Rapid & Blitz Poland турнирининг рапид қисмида 8-ўринни эгаллади.
Аввалги куни кетма-кет учта мағлубиятга учраган Синдаров учинчи ўйин кунида мумкин бўлган 6 очкодан 4 очко тўплади: у Федосеевни мағлуб этди, кейин эса Фабиано Каруана ва Алиреза Фиружа билан дуранг ўйнади.
Chess.com ёзишича, Федосеевга қарши партияда Синдаровнинг «ажойиб ўйин» намойиш этди. Иккинчи кун омадсиз бўлганига қарамай, ўзбекистонлик шахматчи мураккаб вазиятлардан қочмади ва ўзига хос услубда 11.Nxe5 юриши билан курашга киришди. Унинг жасорати ўзини оқлади: икки енгил фигурага қарши рух ва икки пиёда билан кечган эндшпилда Синдаров партияни ғалаба билан якунлади.
Шундан сўнг Синдаров америкалик Фабиано Каруана ва франциялик Алиреза Фиружа билан дуранг ўйнади. Каруанага қарши партияда у жаҳоннинг тўққизинчи чемпиони Тигран Петросян услубида сифатни қурбон қилди ва оқ катаклар устидан устунликка эришди. Chess.com баҳосига кўра, бу устунлик берган, аммо ҳал қилувчи зарба учун етарли бўлмаган.
Рапиднинг тўққиз туридан сўнг Синдаров 16 имкониятдан 8 очко тўплаб, етакчилардан ортда бораётган шахматчилар гуруҳидан жой олди. Максим Вашье-Лагравда ҳам шунча очко бор. Алиреза Фиружа 6 очко, Радослав Войташек эса 5 очко тўплаган. Турнир пешқадами 13 очко билан америкалик Ханс Ниманн бўлиб турибди. Иккинчи ўринда 12 очко билан Уэсли Со, учинчи ўринда эса 11 очко билан Владимир Федосеев бормоқда.
Super Rapid & Blitz Poland турнири Grand Chess Tour сериясига киради ва 5−10 май кунлари Польшада ўтмоқда. Рапид баҳсларида ҳар бир иштирокчига 25 дақиқадан вақт назорати ва ҳар бир юришдан сўнг 10 сония қўшиб берилди. Блицда эса ҳар бир юриш учун 5 дақиқа вақт назорати ва 2 сония қўшиб берилади. Рапидда ғалаба учун 2 очко, дуранг учун 1 очко, мағлубият учун 0 очко берилади. Блицда эса очколар одатий тизим — 1 / 0,5 / 0 бўйича ҳисобланади.
Кейинги икки кунда иштирокчилар блиц бўйича 18 та партия ўйнайди, бунда ғалаба 1 очко билан баҳоланади. Блицнинг биринчи куни 8 майда бошланади. Босқич ғолиби икки йўналиш бўйича жами очколарга кўра аниқланади.
Gazeta аввалроқ турнир формати ва иштирокчилари ҳақида ёзган эди.
Варшавадан кейин серия Бухарестдаги (Руминия) классик турнир, Загребдаги (Хорватия) тезкор босқич, Сент Луисдаги (АҚШ) икки турнир ва яна АҚШда ўтадиган финал билан давом этади.