Апрелда Ўзбекистонда ойлик инфляция кўрсаткичи ўзгаришсиз сақланиб, 0,6 фоизни ташкил этди. Бу Миллий Статистика қўмитаси маълумотларидан келиб чиқади.
Йиллик ҳисобда нархлар ўсиши 7 фоизгача секинлашди (март ойида — 7,1 фоиз). Ўтган йилнинг март ойида йиллик инфляция 10,1 фоизни (ойлик кўрсаткич 0,7 фоиз) ташкил қилган эди.
Йиллик ҳисобда суғурталаш ва молиявий хизматлар (2025 йил апрель ойига нисбатан +41,7 фоиз), турар жой ва коммунал хизматлар (+17,2 фоиз), ресторан ва меҳмонхона хизматлари (+8,6 фоиз) энг кўп қимматлашди. Таълим хизматлари (+1,7 фоиз), уй-рўзғор буюмлари (+2,3 фоиз) ҳамда кийим ва пойабзал нархлари (+2,6 фоиз) энг секин ўсди.
Йил бошидан бери суғурта ва молиялаш хизматлари ҳамда озиқ-овқат маҳсулотлари нархлари энг тез ўсди.
Озиқ-овқат маҳсулотлари
Ой давомида асосий озиқ-овқат маҳсулотларидан қўй гўшти — 3,7 фоизга (2025 йил апрель ойига нисбатан +20,3 фоиз), суякли мол гўшти — 3,2 фоизга (+16,6 фоиз), суяксиз мол гўшти — 3,2 фоизга (+17,3 фоиз), гўшт қиймаси — 2,9 фоизга (+14,1 фоиз), шакар — 2,2 фоизга (+2,1 фоиз), тирик ва совутилган балиқ — 2,0 фоизга (+6,2 фоиз), ўсимлик ёғи — ўртача 0,8 фоизга (+10,6 фоиз) ва сут нархлари ўртача 0,4 фоизга (+5,6 фоиз) ошди.
Қўмитанинг аниқлик киритишича, апрель ойида импорт мол гўшти нархларида бир кг учун 5 000 сўмдан 15 000 сўмгача бўлган оралиқда ўсиш, маҳаллий мол гўшти нархларида бир кг учун 2 000 сўмдан 5 000 сўмгача бўлган оралиқда ўсиш кузатилди.
Ой давомида асосан тухум — 3,6 фоизга (2025 йил апрель ойига нисбатан +16,7 фоиз), гуруч ва гуруч оқшоғи — 1,1 фоизга (-12,8 фоиз), парранда гўшти — 1,2−1,3 фоиз оралиғида (+4,6 — +5,7 фоиз) нархлари пасайди.
Асосий мева-сабзавот маҳсулотларидан булғор қалампири — 10,3 фоизга (2025 йил апрель ойига нисбатан -4,0 фоиз), картошка — 6,5 фоизга (+18,9 фоиз), олма — 4,5 фоизга (+23,3 фоиз), сабзи — 3,2 фоизга (-10,4 фоиз) қимматлашди. Бодринг — 26,1 фоизга (-8,9 фоиз), кўкатлар — 3,3 фоизга (-4,5 фоиз), пиёз — 2,7 фоизга (-21,5 фоиз), помидор — 2,4 фоизга (-7,7 фоиз), карам — 2,4 фоизга (-9,8 фоиз), банан — 1,3 фоизга (+3,9 фоиз) арзонлашди.
Транспорт
Ой давомида бензин нархлари 1,4 фоизга (2025 йил апрель ойига нисбатан +11,2 фоиз) ошди. Бунда, бензиннинг АИ-92 маркаси — 1,6 фоизга, АИ-95 маркаси — 0,9 фоизга, АИ-98 ва АИ-100 маркалари эса — 0,2 фоизга қимматлашди. Пропаннинг нархи ой давомида 2,8 фоизга (+16,7 фоиз) арзонлашиб, 1 литр учун юқори нарх чегараси 7 000 сўмни ташкил этди. Метан нархи 0,7 фоизга (+27,9 фоиз) ошиб, 1 м.куб учун юқори нарх чегараси 5 400 сўмни ташкил этди.
Автотураргоҳлар хизмати 0,8 фоизга (+11,8 фоиз) қимматлашди.
Йўловчи ташиш транспорти хизматлари бўйича нархлар ўсиши қуйидагича кузатилди:
- халқаро авиақатновлар — 2,6 фоизга (-7,9 фоиз);
- маҳаллий авиақатновлар — 2,3 фоизга (-13,1 фоиз);
- шаҳар автобусларида йўл ҳақи — 1,6 фоизга (+16,4 фоиз);
- узоқ масофага қатновчи поездлар — 1,4 фоизга (+13,6 фоиз).
Бошқа соҳалар
Апрелда асосий коммунал хизматлардан фақат маиший чиқиндиларни олиб чиқиб кетиш хизматлари учун тарифлар ўртача 2,4 фоизга (2025 йил апрель ойига нисбатан +28,0 фоиз) қимматлашди.
Ой давомида уй-жой ижараси тўлови 0,6 фоизга (+2,5 фоиз) ошди.