Италиянинг Ўзбекистондаги собиқ элчиси Пьергабриэле Пападиа де Боттини ди Сант’Анезе коррупция ва ноқонуний миграцияга кўмаклашишда айбланиб Римда қўлга олинди. Бу ҳақда la Repubblica хабар қилди.
Тергов материалларига кўра, у Москвадаги консуллик фаолияти давридаги собиқ ёрдамчиси — 53 ёшли Россия фуқароси, Италия паспортига эга ва Болгарияда яшовчи Татьяна Таракановани виза бўлимига ишга жойлаштирган.
Ҳозирда Рим прокуратураси ҳар икки шахсга нисбатан ноқонуний миграцияга кўмаклашиш ва хизмат вазифасига зид равишда коррупцияга қўл уриш айблари бўйича жиноят иши қўзғатган.
Молия гвардияси ходимлари Пападиани Римда ҳибсга олган. У тергов якунига қадар қамоқда сақланади. Маълум бўлишича, элчи 2025 йил декабридаёқ лавозимидан четлатилган.
Тергов маълумотларига кўра, Пападиа ва Тараканова Россия фуқаролари учун 1 йилдан 3 йилгача амал қилувчи туристик визалар бериш схемасини йўлга қўйган. Визалар ҳатто Шенген ҳудудига кириш талабларига жавоб бермайдиган шахсларга ҳам расмийлаштирилган. Айтилишича, ҳар бир виза учун 4 минг евродан 16 минг еврогача ноқонуний тўлов олинган. Ваҳоланки, расмий давлат божи 45−60 еврони ташкил қилади. Шунингдек, бой мижозлар учун алоҳида VIP тариф ҳам жорий қилинган.
Схема Москвада бир манзилда жойлашган Happy Travel, Visa4you ва Park Lane агентликлари орқали амалга оширилгани айтилмоқда.
Терговчилар маълумотига кўра, камида 95 нафар Россия фуқароси ушбу тизим орқали Италияга кирган. Улар орасида Ўзбекистонда доимий яшаш жойига эга бўлмаган, ҳужжатларида сохта имзолар қўйилган ва элчихонага шахсан келмасдан виза олган шахслар бўлган. Баъзи буюртмалар элчига тўғридан-тўғри Telegram орқали юборилгани ҳам қайд этилган.
Тергов 2025 йил 23 июлда Италия ташқи ишлар вазирлиги инспекцияси текширувидан кейин бошланган. Текширилган 92 та виза ҳужжатининг 81 тасида аризачиларнинг элчихонага келгани ҳақида қайд бўлмаган.
Шунингдек, 2025 йилнинг биринчи ярмида Visa Concord Travel агентлиги Тараканованинг Болгариядаги ҳисоб рақамига 23,6 минг еврони «фоизли қарз» сифатида ўтказиб бергани аниқланган.
Текширув вақтида элчининг ўринбосари Марко Эспосто у билан бўлган суҳбатни яширинча ёзиб олгани айтилмоқда. Суҳбатда Эспосто: «Буни пул учун қилдингизми?» деб сўраганида, Пападиа: «Менга пул керак эди», деб жавоб берган.
Ҳозирда терговчилар 400 та виза ҳужжатини ва элчининг қарийб 3 миллион еврога тенг бойлигини текширмоқда. Пападиа ушбу маблағлар мерос эканини айтган. Шунингдек, унинг Россияга қочиб кетишга урингани ҳам маълум қилинган.
Пападиа 2024 йил декабрда Италиянинг Ўзбекистондаги элчиси этиб тайинланганди. 2025 йил сентябрь ойидан бошлаб Андреа де Филип Италиянинг Тошкентдаги элчихонасининг муваққат ишлар вакили этиб тайинланди.