Хотира ва қадрлаш куни муносабати билан Тошкент шаҳри ҳокимлиги кўчалардаги экранларда Ўзбекистон халқининг Иккинчи жаҳон урушидаги ғалабасига қўшган ҳиссаси ҳақидаги қисқа видеороликларни намойиш этмоқда.
Материаллар архив маълумотлари асосида Мудофаа вазирлиги, «Ўзархив» агентлиги ва Миллий университетнинг Тарих факультети вакиллари иштирокида тайёрланган, дея аниқлик киритди шаҳар маъмурияти Gazeta`га.
Пойтахтдаги 151 та мониторда намойиш этилаётган 12 турдаги видеороликлар ўзбек халқининг фронт ва фронт ортидаги меҳнати ҳамда жасоратини акс эттиради.
Уларда қуйидаги фактлар келтирилган:
- 1941−1945 йилларда Ўзбекистондан 1 950 700 киши фронтга сафарбар этилди, уларнинг 896 366 нафари жанг майдонларидан қайтмади, 870 942 нафари эса яраланди.
- Республикада 2000 дан ортиқ самолёт, 19 мингта авиамотор, 18 мингта миномёт, 600 мингта снаряд, 700 мингта авиабомба, 1 миллионта граната, 22 миллионта мина, 420 мингта парашют, шунингдек, озиқ-овқат, дори-дармон ва иссиқ кийим-кечаклар ишлаб чиқарилди.
- Уруш йилларида 230 та корхона мудофаа маҳсулотларини ишлаб чиқарди. Республикага 104 та завод эвакуация қилинди ва 280 та янги корхона ташкил этилди. Фронт эҳтиёжлари учун 7,5 млн дона гимнастёрка, 2,6 млн дона пахтадор нимча ва 2,8 млн жуфт армия этиги тайёрланиб, жўнатилди.
- Уруш йилларида Ўзбекистон 1,5 млн эвакуация қилинган кишини, шу жумладан, 250 минг нафар болани қабул қилди. Улардан 5542 нафари оилаларга фарзандликка берилди, қолганлари эса болалар уйларига жойлаштирилди.
- Бундан ташқари, 485 минг нафар ярадор госпиталларда даволанди, донорлар эса 13 минг литрдан ортиқ қон топширдилар.
«Лойиҳа ёш авлодга халқимизнинг тарихий хотирасини етказиш, уруш йилларидаги матонат ва бирдамликни эслатиш ҳамда аждодларимиз хотирасига ҳурмат руҳини кучайтиришга хизмат қилади», — дейилади ҳокимлик матбуот хизмати хабарида.
