Арманистон бош вазири Никол Пашинян Қорабоғ масаласи бўйича кескин баёнот бериб, ушбу ҳудудни Арманистонники деб ҳисобламаслигини айтди. Унинг сўзларига кўра, «Қорабоғ ҳаракати» Арманистон учун «жиддий хато» бўлган.
Арман ОАВ ва ижтимоий тармоқларда кенг тарқалган видеода Пашинян: «Бу ер қандай қилиб бизнинг бўлди? Илтимос, тушунтириб беринглар», дея савол қўйган.
Бош вазир ўн йиллар давомида шаклланган миллий қарашларга қарши чиқиб, Қорабоғда арманлар томонидан тўлиқ ҳаёт барпо этилмаганини таъкидлаган.
«У ерларда завод қурилдими? Болалар боғчаси очилдими? Биз у ерда яшадикми? Улар бизнинг ерлар эмас эди», – деган Пашинян.
Мақолада айтилишича, Пашиняннинг бу чиқиши Арманистоннинг Озарбайжон билан тинчлик жараёнини давом эттириш ва Европа Иттифоқига яқинлашиш сиёсати фонида янграган.
Ереванда ўтган Европа сиёсий ҳамжамияти саммитида Франция президенти Эммануэл Макрон ҳам Арманистоннинг Россия таъсиридан узоқлашиб, Европа йўлини танлаётганини қўллаб-қувватлаган.
Озарбайжон президенти Илҳом Алиев эса Арманистондаги «аксилозарбайжон кучлари» ҳокимиятга келса, бу энг аввало арман халқининг ўзига зарар бўлишини айтди.
Унинг таъкидлашича, Боку минтақада тинчлик ва иқтисодий ҳамкорлик тарафдори бўлиб қолмоқда.
Россия президенти Владимир Путин эса Арманистоннинг Европа Иттифоқига яқинлашуви бўйича референдум ўтказиш «мантиқий бўлиши»ни айтган.
Путин Украина мисолини келтириб, Киевнинг Европа йўлини танлаши урушга олиб келганини таъкидлаган.
Пашинян эса ҳозирча бундай референдум режалаштирилмаганини билдирди. Шу билан бирга, Арманистон Евроосиё иқтисодий иттифоқидан чиқиш нияти йўқлигини ҳам қайд этган.