Футбол бўйича 2026 йилги Жаҳон чемпионати бир вақтнинг ўзида учта мамлакатда — АҚШ, Канада ва Мексикада 11 июндан старт олади. Лекин унинг атрофидаги ахборот шовқини аллақачон кучайиб бормоқда. Gazeta бу шовқин ичида йўқолиб қолмасдан, Дмитрий Поваров билан биргаликда ҳаммасини бирма-бир таҳлил қилишга уриниб кўради. «А» гуруҳидан бошлаймиз: Мексика, ЖАР, Жанубий Корея, Чехия.
Gazeta’нинг «А» гуруҳи бўйича башорати
Мексика
Досье. Бу мамлакат терма жамоаси жаҳон чемпионатларида 17 марта иштирок этган, 1994 йилдан бери мусобақанинг доимий қатнашчиси. «Уч ранглилар» 1970 ва 1986 йилларда ўз мамлакатлари мезбонлик қилган мундиалларда энг яхши натижаларини қайд этиб, чорак финал босқичигача чиққан. Мезбон мамлакатлардан бири сифатида Мексика бу сафар турнирга автоматик тарзда йўлланма олди. Натижада жамоа ярим йил давомида Панама (1:0), Боливия (1:0) ва Исландия (4:0) билан ўртоқлик ўйинлари ўтказиш билангина чекланди. Март ойида Португалия билан қайд этилган дуранг мексикаликларнинг одатий оптимизмини бироз сўндиришга мажбур қилди. ФИФА рейтингида 15-ўринда.
Жамоанинг фойдасига: «Ўз уйингда деворлар ҳам қўллайди» деган сийқаси чиққан ҳақиқат бу гал ҳам мексикаликлар учун қуруқ гап бўлиб қолмайди. Мехико шаҳридаги машҳур «Ацтека» стадиони (вақтинчалик номи — Estadio Banorte) денгиз сатҳидан 2,2 минг метрдан ортиқ баландликда жойлашган бўлиб, бу ерда рақиблар машғулотнинг ўзидаёқ чарчай бошлайди. Хавьер Агирре бошчилигидаги жамоа 2013 йилдан буён ўз уйида мағлубиятга учрамай келяпти. Ҳимоя марказини Сезар Монтес («Локомотив», Москва) ва Йохан Васкес («Дженоа») каби марказий ҳимоячилар жуфтлиги мустаҳкамлаб турибди. Шунингдек, янги авлод ҳам етишиб чиққан: ярим ҳимоячи Обед Варгас («Атлетико», Мадрид) ва 17 ёшли Гильберто Мора («Тихуана»).
Жамоанинг зарарига: Жамоанинг истиқболларига берилган асосий зарба — кўплаб муҳим ўйинчиларнинг жароҳат туфайли сафдан чиққани. Асосий дарвозабон Луис Малагон («Америка») мундиални аниқ ўтказиб юборади. Икки асосий ўйинчи: жамоа сардори Эдсон Алварес («Фенербаҳче») ва ҳужумчи Сантьяго Хименеснинг («Милан») айни пайтдаги формаси эса катта сўроқ остида. Агирре ўзи учун олтинчи жаҳон чемпионатига 40 ёшли дарвозабон Гилермо Очоани таркибга киритишга ҳамда клублар захирасидан мексикан илдизларига эга легионерлар — испаниялик Альваро Фидальго («Бетис») ва колумбиялик Хулиан Киньонесни («Аль-Аҳли») излашга мажбур бўлмоқда.
Фото: Мексика футбол федерацияси.
Opta компьютерининг башорати:
- гуруҳдан чиқиш — 48,39%,
- финалга чиқиш — 4,19%,
- чемпионлик — 1,61%.
Gazeta башорати: Мухлисларнинг кутилмалари ва мезбонлик мақоми мексикаликларга қандай таъсир қилишини олдиндан айтиш қийин. Лекин, ҳар ҳолда, ижобий бўлади. Бундай гуруҳдан чиқиш масаласини муҳокама қилишга ҳам ҳожат йўқ. Ўз майдонида ўйнаётгани 1/8 финалга чиқиш учун курашишга ёрдам беради. Чорак финал эса — фақат мўъжиза рўй берсагина мумкин. Маълумки, Мексикада мўъжизалар ҳатто тошдан ясалган ацтек бутлари ҳам йиғлайдиган сериалларда содир бўлади.
ЖАР
Досье. Тарихдаги тўртинчи ва сўнгги 16 йилдаги илк жаҳон чемпионати. 2010 йил ўз уйида ўтган турнирдан сўнгги қайтиш. Ўшанда ЖАР гуруҳдан чиқа олмаган илк мезбон мамлакатга айланганди. «Бафана-Бафана» саралашдан Нигерияни ортда қолдириб, биринчи ўрин билан ишончли тарзда ўтди. Гарчи ўзига хос африканча «таваккал»сиз иш битмади: дисквалификация қилинган Тебохо Мокоэна сабабли Лесотога қарши ўйиндаги техник мағлубият интрига қўшди, лекин якуний натижага таъсир қилмади. ФИФА рейтингида 60-ўринда.
Жамоанинг фойдасига: Бельгиялик мураббий Уго Броос бу терма жамоани деярли қайтадан тузиб чиқди: қиёфасиз жамоадан 2024 йилги Африка Кубогининг бронза медали соҳибига айлантирди. Жамоанинг ўзаги «Орландо Пайретс» ва «Мамелоди Сандаунз» футболчиларидан таркиб топган — ўзаро алоқалар тушунарли, вазифалар аниқ. Дарвозабон — Ронвен Уилямс, усиз ЖАР икки баробар кўпроқ гол ўтказиб юборган бўларди. Ҳимоячи — Грант Кекана, мудофаа чизиғидаги ҳақиқий гранд. Ўрта чизиқдаги икки «қароқчи» — Релебохиле Мофокенг ва Осуин Апполлиснинг исм-шарифини талаффуз қилишга қийналаётганлар бўлса, зудлик билан ўрганиб олинг.
Жамоанинг зарарига: Жанубий африкаликларнинг ҳужуми у қадар кескин ва сермаҳсул эмас. Лайл Фостер («Бёрнли») Англия Премьер-лигасига мослашган бўлса-да, ҳар доим ҳам асосий таркибда майдонга тушмайди. 31 ёшли Перси Тау («Намдин») эса Вьетнамнинг энг кучли бўлмаган чемпионати ўйинларида ҳам ўзини кўрсата олмаяпти. Мексика иқлими шароитида зарбдор ҳужумчиларсиз Жанубий Африка тиришқоқ ва курашчан жамоа бўлишига қарамай, анча ўртамиёна кўринади.
Фото: Жанубий Африка футбол ассоциацияси.
Opta компьютерининг башорати:
- гуруҳдан чиқиш — 11,04%,
- финалга чиқиш — 0,4%,
- чемпионлик — 0,07%.
Gazeta башорати. Плей-оффга чиқиш — бу фантастика. Бунга фақат Мексика божхонаси гуруҳ ўйинларининг бирида ғалаба қозониш учун Жанубий Африкадан олиб кирилаётган сеҳрли анжомларга кўз юмган тақдирдагина эришиш мумкин. Турнирни Мексикага қарши бошлашга тўғри келади. Бу жамоанинг максимум имконияти — стартда дурангга илиниб олиш ва Жанубий Корея билан бўладиган ҳал қилувчи тургача етиб бориш. Ўша ўйинда эса ҳамма нарса битта вазиятга боғлиқ бўлади.
Корея Республикаси
Досье. «Осиё йўлбарслари» жаҳон чемпионатига 11-марта йўл олмоқда, қолаверса, 1986 йилдан буён бирорта ҳам мундиални ўтказиб юбормаган. Энг яхши натижаси — ўз уйида ўтган ЖЧ-2002 даги тўртинчи ўрин. Ўшанда улар «бронза» учун курашда Туркияга имкониятни бой беришган. Корейслар Осиёдаги саралаш босқичидан ишончли ўтишди — ўз гуруҳида биринчи ўринни эгаллаб, мағлубиятлар устунида «ноль» рақамини қайд этишди. ФИФА рейтингида 25-ўринда.
Жамоанинг фойдасига: Жамоа мураббийи Хон Мён Бо шогирдларини ўйинлар ва йиғинлардаги фидокорликлари учун мақташдан чарчамаяпти. Яна бир устунлик — гуруҳда энг кучлиси эмаслиги. Терма жамоа сардори Сон Хин Мин ўзининг янги клуби «Лос-Анжелес ФК» сафида камдан-кам гол урса-да, бу унинг терма жамоадаги ўйинларига ҳеч қандай таъсир қилмайди (саралашда 10 та гол). Орқа чизиқда ҳаммасини «Бавария» аъзоси Ким Мин Чже назорат қилади — у жамоанинг ихчам тарзда пастки блокка жойлашишига имкон берувчи ҳимоя етакчиси. Креативлик ва стандарт вазиятлар учун эса ПСЖ футболчиси Ли Кан Ин масъул. Ортиқча ҳеч нарса йўқ, лекин тушунарли мантиққа асосланган мувозанат.
Жамоанинг зарарига: Жароҳатлар жаҳон чемпионатининг кўплаб иштирокчиларига таъсир қилди, бироқ бу гуруҳдаги мексикаликларга қанчалик оғриқли бўлган бўлса, Жанубий Корея жамоасига ҳам шунчалик оғир зарба берди. Марказий ярим ҳимоячилар Хван Ин Бом («Фейеноорд»), Пэк Син Хо («Бирмингем Сити»), Пак Ён У («Аль-Айн»), Вон Ду Чже («Хоур Факкан») — майдон марказини бўшатиб қўйган йўқотишлардир. Асосий ўйинчилар ЖЧга қадар тикланган тақдирда ҳам, уларнинг қандай спорт формасида бўлиши жиддий савол.
Фото: Корея футбол ассоциацияси.
Opta компьютерининг башорати:
- гуруҳдан чиқиш — 22,5%,
- финалга чиқиш — 1,3%,
- чемпионлик — 0,44%.
Gazeta башорати. Учинчи ўрин билан плей-оффга чиқиш. Худди «Кальмар ўйини» сериалидаги каби: аввалига ҳамма нарса жуда вазмин ва ҳатто зерикарли, кейин эса бирданига экшн, кўз ёшлар ва ҳар бир серияда битта ҳал қилувчи бурилиш. Мексика уларни ўз уйида енгади, чехлар билан асосий жанг кутилмоқда, ЖАР эса улар аниқ мағлуб этиши керак бўлган ягона терма жамоадир.
Чехия
Досье. Чехословакия терма жамоасининг ютуқларини ҳисобга олмаганда, чехлар жаҳон чемпионатига 20 йиллик танаффусдан сўнг иккинчи марта йўл олмоқда. Улар Словакия билан ажралгандан кейин илк бор 2006 йилги мундиалда қатнашган эди. Жамоа бўлажак жаҳон чемпионати йўлланмасини Ирландия ва Данияга қарши ўтган иккита плей-офф триллерида қўлга киритди. Иккала ўйиннинг ҳам асосий вақти 2:2 ҳисобидаги жанговар дуранг билан якунланди ва чехлар ЖЧ чиптасини пенальтилар сериясида ютиб олди. ФИФА рейтингида 41-ўнинда.
Жамоанинг фойдасига: Чехия ўзининг кучли ҳужум чизиғи билан ҳақли равишда фахрланади. Айниқса, ўзининг антропометрик маъносида: бугун жамоада афсонавий Ян Коллернинг ворислари — Праганинг «Славия» клуби аъзоси Томаш Хорий (200 см), Англиянинг «Вест Хэм» жамоаси аъзоси Томаш Соучек (193 см) ва Германиянинг «Байер 04» клуби ўйинчиси Патрик Шик (191 см) тўп сурмоқда. Саралашда жамоа стандарт вазиятлардан 11 та гол урди — бу Европадаги энг яхши кўрсаткич. Жамоанинг барча голларининг тенг ярми бурчак тўплари, жарима зарбалари ва аутдан киритилган.
Жамонанинг зарарига: Шунга қарамай, 74 ёшли Мирослав Коубек шогирдлари оёқда бош билан ўйнаганчалик ишончли ўйин кўрсата олмайди, айниқса, рақиб юқори темпда ҳаракат қилганида. ЖАР терма жамоаси аъзоси Апполлис каби футболчилар бирга-бир вазиятларда уларга муаммо туғдириши мумкин. Шу билан бирга, жамоанинг асосини 28−33 ёшли ўйинчилар ташкил этади, ёшлар эса эндигина жалб қилинмоқда. Агар Соучек ёки Шик сафдан чиқса, захира ўриндиғи чуқурлиги ҳавас қиладиган даражада эмас.
Фото: Ян Таубер / Чехия футбол ассоциацияси.
Opta компьютерининг башорати:
- гуруҳдан чиқиш — 18,07%,
- финалга чиқиш — 0,81%,
- чемпионлик — 0,18%.
Gazeta башорати. Чехия терма жамоасидаги турғунлик даври тугади, бироқ йирик ғалабалар палласига ҳали анча бор. Чехлар, умуман олганда, иккинчи ўрин билан плей-оффга чиқишга қодир. Бироқ улар ўзларининг эҳтиёткорона тактикаси билан у ерда ҳеч бўлмаганда битта босқичдан ўтишлари учун дарвозабон Матей Коваржнинг («ПСВ Эйдховен») ўйиндан кейинги пенальтиларни қайтаришдаги маҳоратига умид қилишлари керак бўлади.
Ўйинлар жадвали
«B» гуруҳи иштирокчилари бўйича шарҳни 14 май куни Gazeta`да ўқинг.