15 майдан 24 майга қадар Алишер Навоий номидаги давлат академик катта театрида (ДАКТ) «Тошкент баҳори» VIII халқаро опера ва балет фестивали бўлиб ўтади.
Тадбир дастурини La Scala, Arena di Verona, Metropolitan Opera театрларининг етакчи солистлари, шунингдек, Италиянинг Палермодаги Massimo ва Туриндаги Regio театрлари саҳналарида чиқиш қилувчи ижрочилар иштирокидаги гала концерт очиб беради.
Фестиваль давомида театр саҳнасида Беларусь, Грузия, Молдова, Россия, Руминия ва Черногориядан келган санъаткорлар чиқиш қилади.
«Оққуш кўли» балетида Одетта ва Одиллия партияларини «Кремль балети» театри прима-балеринаси Екатерина Первушина (Россия) ижро этади. У Алишер Навоий номидаги ДАКТ етакчи солисти Улуғбек Олимов билан жуфтликда саҳнага чиқади.
«Травиата» операсида томошабинлар бир йўла уч мамлакат вакилларини кўриши мумкин. Виолетта партиясини З. Палиашвили номидаги Тбилиси давлат опера ва балет театри солисти Марика Мачитидзе (Грузия) ижро этади. Альфред ролида Руминия миллий операси солисти Флорин Гузга (Руминия) намоён бўлади. Дирижёрлик пультини эса М. Биешу номидаги Опера ва балет театри директори Николай Доготару (Молдова) эгаллайди.
«Дон Жуан» операсидаги Донна Эльвира партиясини К. С. Станиславский ва Вл. И. Немирович-Данченко номидаги Москва академик мусиқа театри солисти Наталья Петрожицкая (Россия), Дон Оттавио ролини шу театрнинг ўзидан Кирилл Золочевский, Церлина ролини эса халқаро танловлар лауреати Алиса Медведева (Черногория) ижро этади.
Фестиваль меҳмони — Катта театр премьери Дмитрий Выскубенко (Россия) «Баядерка»да Солор партиясини, Никия ролини эса Навоий номидаги ДАКТ етакчи солисти Ширин Власенко ижро этади.
Якуний гала концертда фестиваль иштирокчилари сафига Беларусь Катта театри опера солисти Оксана Волкова қўшилади.
Фестиваль дастури
15 май — фестиваль очилиши, гала концерт.
17 май — «Жизель» балети, Адольф Адан.
20 май — «Оққуш кўли» балети, Пётр Ильич Чайковский.
21 май — «Травиата» операси, Жузеппе Верди.
22 май — «Дон Жуан» операси, Вольфганг Амадей Моцарт.
23 май — «Баядерка» балети, Людвиг Минкус.
24 май — фестивалнинг тантанали ёпилиши, гала концерт.
«Тошкент баҳори» фестивали доирасидаги спектаклларга чипталарни iticket.uz сайти орқали харид қилиш мумкин.