14 май куни ижтимоий тармоқларда Ангрендаги зиплайнда икки киши тўқнашиб кетгани акс этган видео тарқалди. Унда номаълум сабабга кўра зиплайн (тросли тушиш аттракциони) йўлининг ўртасида тўхтаб қолган бир кишига ортидан келаётган иккинчи одам келиб урилганини кўриш мумкин.
ФВВ маълум қилишича, аттракцион тегишли ташкилотларнинг ҳеч қандай рухсат берувчи ҳужжатларисиз, ноқонуний фаолият юритиб келган. Тўқнашган фуқаролар жароҳат олмаган.
Хабарга кўра, «Лашкарак» МФЙдаги бу зиплайн 2026 йил 15 январь куни ўрганилиб, далолатнома расмийлаштирилган ва узилган, лекин зиплайн фаолияти ўзбошимчалик билан яна тиклаб олинган.
14 май куни ҳодиса жойига ФВВ ва бошқа идоралар вакиллари етиб борган. Ишчи гуруҳ хулосасига кўра, зиплайн демонтаж қилиниб, аттракцион фаолиятини ташкил этган фуқароларга нисбатан жарима қўлланилган.
Вазирлик фуқароларни тегишли давлат идораларидан расмий рухсат олмасдан, ноқонуний фаолият олиб бораётган аттракционларда учмасликка чақирди.
