АҚШда Вакиллар палатасининг Назорат қўмитаси демократлари ва маҳаллий демократ аъзолар томонидан ташкил этилган сайёр эшитувда Эпштейннинг бир гуруҳ бошқа жабрланувчилари илк бор омма олдида чиқиш қилди. Уларнинг орасида ўзбекистонлик экани билдирилган 36 ёшли Роза номли аёл ҳам бор. Бу ҳақда BBC ёзмоқда.
Ушбу эшитув ҳеч қандай ҳуқуқий кучга эга эмас, бироқ у Эпштейн ишини жамоатчилик диққат марказида тутиб туриш мақсадида режалаштирилган.
Розанинг сўзлаб беришича, у Ўзбекистондаги кам таъминланган оилалардан бирида катта бўлган, ўсмирлик чоғида Эпштейннинг шериги ва модель агентлиги раҳбари Жан-Люк Брюнель томонидан жалб қилинган.
У 2009 йилнинг июль ойида Брюнель орқали Эпштейн билан танишганини, «молиявий муаммоларимни ҳал қилишда ёрдам бериш» ваъдаси билан АҚШга алдаб чақирилганини сўзлаб берди.
«Эпштейн мени вояга етмаган шахсни фоҳишаликка жалб қилганлик айби билан уй қамоғида бўлган вақтида ҳам зўрлаган», — дейди жабрланувчи АҚШ қонунчиларига.
Розанинг сўзларига кўра, у 2008 йилда марҳум Брюнель билан учрашганда 18 ёшда бўлган ва унга «хаёлидагидан ҳам аълороқ моделлик карьераси» ваъда қилинган.
«Молиявий жиҳатдан беқарор оиладан чиққаним сабабли алдов ва мажбурлаш учун қулай нишон эдим», — дея қўшимча қилди у берган кўрсатмасида (йиғлайди).
Аёлнинг айтишича, 2009 йилнинг май ойида у виза билан Нью Йоркка келган, июль ойида эса Эпштейн уй қамоғида бўлган пайтда унинг Уэст-Палм-Бичдаги уйида у билан учрашган.
Шундан сўнг Эпштейн унга ўзининг Florida Science Foundation жамғармасидан иш таклиф қилган. Эпштейн 2008 йилдаги биринчи суд ҳукмидан кейин айнан шу ерда ишлаган (у ўша йилда вояга етмаган шахсни фоҳишаликка жалб қилганликда айбдор деб топилган ва шу сабабли жинсий жиноятчи сифатида рўйхатга олинганди — таҳр.) ва ўшанда унга ҳафтада олти кун, кунига 16 соатгача ҳибсхонани тарк этишга рухсат берувчи келишув амалда бўлган.
«Кунларнинг бирида унинг массажчиси мени Эпштейннинг хонасига чақирди ва у ерда Жеффри мени биринчи марта таҳқирлади», — деди Роза эшитув давомида. «Кейинги 3 йил давомида мен мунтазам равишда зўрлаб келиндим».
Розанинг таъкидлашича, Эпштейн ҳатто уй қамоғида бўлган пайтида содир этган зўравонликлар «адолатга бўлган ишончни сўндирган», бироқ у «охир-оқибат ёрдам сўраш учун ўзида куч топа олган».
Аёл, шунингдек, Адлия вазирлиги томонидан эълон қилинган Эпштейн ишига оид ҳужжатларда унинг исми очиқланиб кетгани унга янги руҳий жароҳатларни етказгани, ваҳоланки, «бой ва қудратли шахсларнинг исмлари ҳужжатларни таҳрирлаш орқали яширилганини» айтди.
«Энди бутун дунёдан мухбирлар мен билан боғланишга ҳаракат қилмоқда. Доимий хавотир ва қўрқув билан яшаяпман. Бу „хато“ ҳаётимга узоқ муддатда қандай таъсир кўрсатишини тасаввур қилиш оғир», — деди у.
Адлия вазирлиги аввалроқ «жабрланувчиларни ҳимоя қилиш масаласига жуда жиддий ёндашишини» билдирганди. Жабрланувчилар ҳужжатлардаги камчиликлар туфайли уларнинг шахси фош бўлганини айтгач, вазирлик Эпштейнга оид бир қатор файлларни ўз веб сайтидан олиб ташлаган. Адлия вазирлиги бу камчиликлар «техник ёки инсон омили» сабабли юз берганини маълум қилган.
Аввалроқ ҳам Эпштейн файлларида ўзбекистонлик бошқа бир қиз номи тилга олинганди. Ёзишмаларга кўра, қиз 2012 йилда молиячига электрон почтадан ёзиб, ўзи ҳақида маълумот берган. Сўнгра Эпштейн қизнинг Париждаги таълим харажатларини кўтаргани англашилади.