Москва мэри Сергей Собяниннинг маълум қилишича, Украина Қуролли кучлари 17 майга ўтар кечаси Москва вилоятига ҳужум уюштирди. Украина пабликлари бу Россия қўшинларининг Украинага босқини бошланганидан бери Москвага қилинган энг йирик ҳужум эканини ва ўнлаб объектларга шикаст етганини ёзмоқда.
Москва. Собяниннинг Telegram каналидаги хабарларидан маълум бўлишича, ярим тундан тонгги соат 7 га қадар Москвага яқинлашаётган 81 та учувчисиз учиш аппарати уриб туширилган, охирги бир сутка ичида эса ҳаво ҳужумидан мудофаа кучлари жами 120 дан ортиқ дронни йўқ қилган.
Собяниннинг сўзларига кўра, зарбалардан бири Капотнядаги Москва нефтни қайта ишлаш заводининг кириш жойига тўғри келган ва у ерда қурувчилар жароҳат олган. «Завод технологиясига зарар етмаган», — деди шаҳар раҳбари. Гувоҳлар томонидан олинган кадрларда дроннинг завод яқинига қулаётганини кўриш мумкин. Унинг айнан қаерга теккани номаълум.
Дронлар ҳужуми оқибатида, дастлабки маълумотларга кўра, 12 киши жароҳатланган, уларнинг аксарияти завод кириш жойи яқинида бўлган. Бундан ташқари, учта уйга шикаст етган. Astra нашрининг хабар беришича, Зеленоградда (Москва таркибига киради) турар жой биносининг фасадига зарар етган. Гувоҳлар Михайлов кўчасидаги кўп квартирали турар жой биносига дрон келиб урилиши оқибатлари акс этган фотосуратларни олган.
Зеленограддаги зарбанинг нишони электрон ва оптик техника ишлаб чиқарувчи «Элма» технопарки бўлган.
Украина дронлари ҳужумидан кейин Москванинг Шереметьево аэропортида ёнғин юз берди, деб хабар бермоқда Astra. Дастлабки маълумотларга кўра, ёнғин учинчи учиш-қўниш йўлагида бошланган. Аэропорт маъмурияти у ерга дрон бўлаклари қулаганини ҳамда улар «йўловчиларга хизмат кўрсатиш ва ҳаво кемалари ҳудудларидан хавфсиз масофада» эканини маълум қилди. Ҳужум вақтида аэропорт ёпиб қўйилди, бунинг оқибатида 200 га яқин рейс бекор қилинди ва кечиктирилди. Самолётларнинг бир қисми захира аэродромларига йўналтирилди.
Москва вилояти. Вилоятда амалга оширилган ҳужум оқибатида уч нафар маҳаллий аҳоли вакили ҳалок бўлди, тўрт киши жароҳатланди, деб хабар берди губернатор Андрей Воробьёв. Унинг сўзларига кўра, Химкидаги турар жой биноларига дрон келиб урилиши оқибатида бир аёл, Митишчида эса бир эркак ва бир аёл ҳалок бўлган.
Москва вилояти.
Красногорск.
Москва вилояти.
Губернаторнинг маълум қилишича, дронлар Красногорск ва Дедовскдаги кўп квартирали уйларга, Истра яқинидаги Агрогородок ва Наро-Фоминск яқинидаги Субботино қишлоғидаги хусусий хонадонларга урилган. Гувоҳлар томонидан олинган тасвирларга кўра, Химкида дрон кўп квартирали уйга теккан, расмийлар ушбу маълумотни тасдиқлади.
«Бундан ташқари, бир нечта муниципал туманлардаги инфратузилма объектларига ҳужум қилинди», — деб баёнот берди Воробьёв. Россия ва Украина Telegram каналларининг хабар беришича, Москва вилоятига берилган зарбадан сўнг Солнечногорск нефть қуйиш станциясида ёнғин келиб чиққан. Ушбу станция нефть маҳсулотларини қабул қилиш, сақлаш ва тақсимлашга мўлжалланган. Россия Мудофаа вазирлигининг маълум қилишича, 16 май куни соат 22:00 дан (Тошкент вақти билан 00:00) 17 май тонгги 7:00 га қадар ҲҲМ кучлари Россия ҳудудлари ва аннексия қилинган Қрим узра Украинанинг 556 та дронини уриб туширган.
Россиянинг Украинага ҳужумлари
Россия Қуроллани кучлари ҳам, ўз навбатида, 17 майга ўтар кечаси Украинанинг бир нечта шаҳарларига ҳужум уюштирди.
Днепрга қилинган дронлар ҳужуми оқибатида, маҳаллий расмийларнинг маълум қилишича, бир нечта ёнғин келиб чиққан. Уч киши жароҳатланган. Битта корхона ва хусусий уйларга шикаст етган.
Запорожье вилоятининг Запорожье туманида эса Россия Қуролли кучларининг зарбаси оқибатида автоёнилғи қуйиш шохобчаси шикастланган. Расмийларнинг хабар беришича, бир аёл жароҳат олган.
Россия Қуролли кучлари Суми шаҳрига ҳам ҳужум қилди, бунинг оқибатида кўп квартирали турар жой биноларининг ойналари синиб кетган, савдо марказларидан бири ва автомобилларга зарар етган.
Тунда Россия Харьковга ҳам зарба берди, деб хабар қилди Украина Фавқулодда вазиятлар давлат хизмати. Ҳужум туфайли еттита енгил автомобиль ёниб кетган. Портлаш тўлқини оқибатида кўп квартирали ва хусусий уйларнинг ойналарига шикаст етган. Ҳеч ким жароҳатланмаган.
Украина Қуролли кучлари Ҳаво кучларининг баёнот беришича, Россия тун давомида жами 287 та учувчисиз учиш аппаратини ишга туширган, улардан 279 тасини уриб туширишга муваффақ бўлинган. Саккизта дрон еттита ҳудудга келиб урилган, бундан ташқари, дрон бўлаклари ҳам еттита жойга қулаган.
«Ушбу ҳафта давомида россияликлар Украина бўйлаб 3170 дан ортиқ зарба берувчи дрон, 1300 дан зиёд бошқариладиган авиабомба ва 74 та турли турдаги ракеталар отди, уларнинг аксарияти баллистик ракеталардир. Турар жой бинолари ва бошқа фуқаролик инфратузилмаларига кўплаб зарбалар берилди. Афсуски, ҳафта давомидаги ўққа тутишлар оқибатида 52 киши ҳалок бўлди… Яна 346 киши, жумладан, 22 нафар бола жароҳатланди», — деб ёзди Украина президенти Владимир Зеленский тунги ҳужумлардан сўнг ўзининг Telegram каналида.