Gazeta ва Дмитрий Поваров футбол бўйича 2026 йилги жаҳон чемпионати старт олишигача қолган кунларни санашда давом этади. Бугун эътиборингизга ҳавола этадиганимиз «C» гуруҳида пентакампион (беш карра чемпион) бразилияликлар, шунингдек, камида тўрт йил аввалги муваффақиятини такрорлашга уринаётган марокашликлар, довюрак шотландлар ва ниҳоят ўз мураббийи билан майдонда учрашиши кутилаётган гаитиликлар тўп суради.
Gazetaʼнинг «C» гуруҳи бўйича башорати
Бразилия
Досье. Жаҳон чемпионати тарихидаги 23 та якуний турнирнинг барчасида иштирок этган ягона терма жамоа. Шунингдек, Бразилия жамоси ушбу турнир тарихида энг кўп — беш карра (1958, 1962, 1970, 1994, 2002 йилларда) ғалаба қозонган, 1950 ва 1998 йилларда «кумуш», 1938 ва 1978 йилларда эса «бронза»ни қўлга киритган. Жамоа чемпионлик учун навбатдаги юришини мухлисларининг ҳуштакбозлиги ва норозилиги остида бошлади: саралаш босқичида 18 ўйиндан иборат узоқ давом этган турнирда олти бор мағлубиятга учраб, атиги бешинчи ўринни эгаллади. ФИФА рейтингида 6-ўринда.
Жамоанинг фойдасига: Саралаш босқичининг ўрталарида, Copa America-2024 мусобақасидаги шармандали ўйиндан сўнг (чорак финалда Уругвайга пенальтилар сериясида мағлуб бўлиб, мусобақани тарк этиш), Бразилия футбол конфедерацияси кутилмаган ишга қўл урди — 1965 йилдан буён илк бор хорижлик мураббий Карло Анчелоттини таклиф қилди. Таниқли италиялик мутахассис «селесао» ўйинини ажойиб тарзда мувозанатга келтириб, жамоага натижа учун зарур бўлган «jogo bonito» ва артистизмнинг аниқ меъёрини белгилаб берди. Копакабана пляжларидан олинган «4−2−3−1» тактик схемаси Винисиус («Реал») ва Рафинья («Барселона») каби юлдузларнинг ҳужумкор салоҳиятидан тўлиқ фойдаланиш имконини беради. Шу билан бирга, Маркиньос (ПСЖ), Габриэль («Арсенал») ва Каземиро («Манчестер Юнайтед») бошчилик қилаётган мудофаа чизиғи ҳам эътибордан четда қолмаган, дарвозани эса ҳали ҳам ўзига ишонч билан Алиссон Беккер («Ливерпуль») ҳимоя қилади.
Жамоанинг зарарига: Бразилияликларнинг ўйини ҳар доим марказий ҳужумчи позициясидаги энг ёрқин юлдузларга таянган. Бироқ Роналдо бутсаларини михга илгандан бери жамоа муносиб форвард топа олмаяпти. Бразилия терма жамоаси асосий таркибининг бирваракайига тўртта ўйинчиси — Матеус Кунья («Манчестер Юнайтед»), Жуан Педро («Челси»), Ришарлисон («Тоттенҳэм») ва Эндрик («Лион») кайфиятга қараб ўйнайдиган футболчилар бўлиб, ўзларининг энг яхши қобилиятларини ҳар доим ҳам намоён эта олмайдилар. Бу қобилиятлар эса ҳар бир ўйинда керак бўлади, чунки бундай йирик турнирларда кучли рақибларга гол уриш бразилияликлар учун одатда осон кечмайди.
Сурат: Rafael Ribeiro / Бразилия футбол конфедерацияси.
Opta компьютери башорати:
- гуруҳдан чиқиш — 60,13%,
- финалга чиқиш — 12,40%,
- чемпионлик — 6,60%.
Gazeta башорати. Анчелотти шогирдлари жанговар қувватларини Марокашга қарши дастлабки ўйинданоқ ишга солишларига тўғри келади. Жаҳон чемпионати арафасида Бразилия жамоасига ҳеч қачон ҳозиргидек шубҳа билан қаралмаган. Лекин бу — ишқибозларнинг шубҳаси. Шунга қарамай, чорак финал — бразилияликлар яна бир ҳафта афсусланиб юрадиган минимал маррадир. Ярим финал кутилган натижа бўлса, финалга чиқиш жасоратга тенг бўлади. Агар Бразилия олти карра жаҳон чемпиони бўлса, Риодаги карнавал бир ҳафта эмас, йил охиригача давом этади.
Марокаш
Досье. «Атлас шерлари» ўз тарихидаги еттинчи жаҳон чемпионатига йўл олмоқда. Марокашликларнинг Қатарда ўтган ЖЧ-2022ʼдаги тарихий муваффақияти — ярим финалга чиққан илк Африка миллати бўлгани — футболдаги кучлар мувозанатини ўзгартириб юборди. Бу сафар Марокаш саралаш босқичидан бир нафасда ўтиб, ўз гуруҳидаги 8 та ўйиннинг барчасида ғалаба қозонди. Статистика ҳайратланарли: 22 та гол урилиб, бор-йўғи 2 та тўп ўтказиб юборилган. Марокашликлар ушбу мундиалга йўлланмани қўлга киритган биринчи Африка жамоаси бўлди. ФИФА рейтингида 8-ўринда.
Жамоанинг фойдасига: Асосан географик жойлашувига кўра Африкага мансуб бўлган Марокаш сўнгги йилларда Европа футбол маданиятининг ажралмас қисмига айланди. Жамоа асосий таркибининг ярми Испания, Нидерландия, Германия ва Англия клублари академияларининг европалик тарбияланувчиларидир. Марокаш терма жамоаси ЖЧ-2026ʼга «тажриба ва ёшлик»нинг ноёб қоришмаси билан яқинлашмоқда. Қатарда сенсация қайд этган ўзак — Яссин Буну («Аль-Ҳилол»), Ашраф Ҳакими (ПСЖ), Софьян Амрабат («Реал Бетис»), Нуссаир Мазрауи («Манчестер Юнайтед») — 2025 йилда U-20 жаҳон чемпионатида ғолиб чиққан «олтин» авлод вакиллари — Отман Маама («Уотфорд»), Жессим Яссин («Страсбург») билан тўлдирилди.
Жамоанинг зарарига: Январь ойида ўз майдонида ўтган Африка Миллатлари Кубогида Сенегалдан учралган аламли мағлубиятдан сўнг газеталар жамоани танқид остига олди, Қатардаги сенсация муаллифи Валид Реграги эса истеъфога чиқарилди. Терма жамоанинг янги мураббийси Муҳаммад Уаҳби Марокаш ёшлар терма жамоаси билан Олимпиада-2024ʼнинг бронза медалини қўлга киритган. Энди ундан камида тўрт йил олдинги натижа талаб қилинмоқда. Айнан шу мажбурият ва ҳар қандай психологик босим ҳал қилувчи ўйинларда Марокаш терма жамоасининг асосий тўсиғига айланиши мумкин.
Сурат: Марокаш Қироллик футбол федерацияси
Opta компьютери башорати:
- гуруҳдан чиқиш — 28,65%,
- финалга чиқиш — 4,64%,
- чемпионлик — 1,80%.
Gazeta башорати. «Атлас шерлари» жаҳон чемпионатига шунчаки ўкиргани келмайди, улар аллақачон тишлашга тайёр. Марокаш терма жамоасининг гуруҳдан чиқиши ҳатто шубҳа остига ҳам олинмаяпти. Плей-оффда улар энди «яширин фаворит» ролини ўйнай олмайди, бироқ чорак финалга чиқиш, албатта, қўлидан келади. Қатардаги жаҳон чемпионати натижасини такрорлаш эса қийинроқ: кутилмаганлик омили йўқолган, марокашликларнинг ўзи эса энди бошқача босим остида тўп суради.
Гаити
Досье. «Гренадерлар» (Les Grenadiers) бир марта — 1974 йилда Германияда бўлиб ўтган Жаҳон чемпионатида иштирок этган. Гаитиликлар учта ўйиннинг барчасида ютқазган: Польшага йирик (0−7) ҳисобда имкониятни бой бериб, қолган икки ўйинни муносиб ўтказган ва Италия (1−3) ҳамда Аргентина (1−4) дарвозасига гол урган. Орадан қарийб ярим аср ўтиб, Гаити жамоаси ўзининг КОНКАКАФ гуруҳида Коста-Рика ва Гондурас жамоаларини сенсацион тарзда ортда қолдириб, мундиалга йўл олди. Қайд этиш жоиз, Гаитида футбол учун шароит бўлмагани сабаб, жамоа уй учрашувларини ватанидан ташқарида ўтказди. ФИФА рейтингида 83-ўринда.
Жамоанинг фойдасига: Мамлакатда давом этаётган фуқаролар урушлари сабабли жамоада маҳаллий футболчилар йўқ, шу боис улар Гаити футболининг изи бўлган дунёнинг исталган нуқтасидан жалб қилинади. Ҳужумдаги асосий фигуралар: ижодкорлик учун масъул ярим ҳимоячи Жан-Рикнер Беллегард («Вулверҳэмптон»), қачонлардир Франция терма жамоасида ўйнашни орзу қилган Вильсон Изидор («Сандерленд») ва 32 ёшли фахрий, терма жамоа тарихидаги энг яхши тўпурар (44 та гол) Дакенс Назон («Истиқлол»). Жамоанинг ҳозирги мураббийи, франциялик Себастьян Минье ҳам ҳеч қачон Гаитида бўлмаган, бундан ташқари, у барча ўйинларни телефон орқали бошқарган. Бу яқин ўтмишдаги ковид даврида кечган «масофавий ишлаш» ҳақидаги ҳикоядек эшитилиши мумкин, лекин саралашда бу усул иш берди.
Жамоанинг зарарига: Гаити мудофааси майдонда ўтиб бўлмас редутлар қуришдан кўра, кўпроқ тактик чизмада мавжуд. Ҳаттоки саралашда ҳам гаитиликлар ҳар ўйинда учтадан гол ўтказиб юборишга улгуришган. Дарвозада 37 ёшли Жонни Пласид («Бастия»), унинг реакцияси ҳам ёшига мос. Қанот ҳимоячиси Карленс Аркюс («Анже») огоҳлантиришлар учун ҳақиқий «магнит» ва у чемпионатда четлатишларсиз ўйнай олмаса керак. Унинг ҳимоя чизиғидаги шериклари Ханнес Делькруа («Лугано») ва Гарвен Метюзала («Колорадо Спрингс») ҳақида ҳам бирор умидбахш сўз айтиш қийин.
Сурат: Гаити футбол федерацияси
Opta компьютер башорати:
- гуруҳдан чиқиш — 1,07%,
- финалга чиқиш — 0,02%,
- чемпионлик — 0,01%.
Gazeta башорати: Жамоа ЖЧ трибуналаридан ўз мухлисларини топади, улар руҳан бақувват «гренадерлар»ни қўллаб-қувватлайди. Гаитиликлар ЖЧда урилган голлар бўйича шахсий рекордини янгилашга қодир, айни пайтда ўтказиб юборилган голлар бўйича антирекордни ҳам янгилаш хавфи бор, бироқ тўпланган очколар графасидаги «ноль»ни ўзгартириши амримаҳол. Мабодо шундай бўлиб қолса, Порт-о-Пренсдаги стадионда жамоага ҳайкал қўйса арзийди, лекин аввал майдонни босқинчилардан тозалаш керак бўлади.
Шотландия
Досье. «Тартан армияси» (машҳур катак мато нақши шарафига) жаҳон чемпионатларида тўққизинчи бор иштирок этмоқда. Олдинги барча уринишлар гуруҳ босқичидаёқ якунига етган. Жорий саралашда эса сўнгги турда Дания устидан қўшиб берилган вақтда қозонилган ақлбовар қилмас ғалаба (4:2) Шотландияни 1998 йилдан бери илк бор мундиалга олиб чиқди. ФИФА рейтингида 43-ўринда.
Жамоанинг фойдасига: Шотландлар мураббийи Стив Кларк шотландча довюракликни итальянча эҳтиёткорлик билан уйғунлаштиришга уринмоқда ва буни анча ишонарли тарзда уддалаяпти. Жамоа саралашда 4 та ғалаба ва 1 та дурангга эришиб, атиги 1 марта мағлуб бўлди. Кельтлар авлодининг яна бир устунлиги — бу ярим ҳимоя. Скотт Мактоминей («Наполи») — Жон Макгинн («Астон Вилла») — Льюис Фергюсон («Болонья») — бу, эҳтимол, марокашликлар ва ҳатто бразилияликларга қарши кураш ҳақида ишонч билан гапириш мумкин бўлган ягона чизиқдир.ьо
Жамоанинг зарарига: Шотландиялик мухлисларни энг кўп ташвишга солаётган нарса — бу орқа чизиқ. 43 ёшли дарвозабон Крейг Гордон («Ҳартс») ҳали ҳам сафда, бироқ Бразилияга қарши ўйинда фақат унинг тажрибасига суяниш — таваккалга қўл уриш билан баробар. Унинг ўринбосари Ангус Ганн «Ноттингем Форест» асосий таркибидан жой олиш учун курашда енгилиб, захира ўриндиғига «михланиб қолди». Шунга қарамай, шотландларнинг асосий заиф нуқтаси — ҳужум чизиғида ёрқин футболчиларнинг етишмаслигидир: Че Адамс («Торино»), Линдон Дайкс («Чарльтон»), Лоуренс Шенкленд («Ҳартс») ҳаракатчан ва фидойи, бироқ бундан ортиғи эмас.
Сурат: Шотландия футбол ассоциацияси
Opta компьютери башорати:
- гуруҳдан чиқиш — 10,15%,
- финалга чиқиш — 0,91%,
- чемпионлик — 0,30%.
Gazeta башорати. Уч очко (Гаити устидан ғалаба), шотландлар учун қийин гуруҳда учинчи ўрин ва плей-оффга энг яхши учинчи жамоалардан бири сифатида чиқиш учун шу уч очконинг етарли бўлишини аниқлаш учун математик ҳисоб-китоблар. Омад келса — 1/16 финал ва топ-жамоага учраб мусобақадан чиқиб кетиш. Омад келмаса — учта ўйиндан сўнг уйга қайтиш, лекин ЖЧдаги 1990 йилдан бери қайд этилган илк ғалаба билан.
Ўйинлар жадвали
«D» гуруҳи иштирокчилари ҳақидаги шарҳни 19 май куни Gazetaʼда ўқинг.