Қирғизистон Адлия вазирлиги санкция хавфи юқори бўлган операцияларга алоқадор 50 та компания фаолиятини тугатиш тўғрисида буйруқ чиқарди. Бу ҳақда идора матбуот хизмати маълум қилди. Мамлакатда бундай чораларга биринчи марта қўл урилди.
Бу қарор ҳукумат томонидан «миллий иқтисодиётни ҳимоя қилиш ҳамда ғарблик ҳамкорлар томонидан эҳтимолий иккиламчи санкция чоралари кўрилиши натижасида Қирғиз Республикаси учун салбий оқибатлар келиб чиқишининг олдини олиш мақсадида» тасдиқланган янги механизм доирасида қабул қилинди.
Ушбу механизм давлат органларидан олинган маълумотлар асосида юридик шахслар фаолиятини соддалаштирилган тартибда тўхтатиш имконини беради. Ёпилган 50 та компания рўйхатини Адлия вазирлигига Қирғизистон Иқтисодиёт ва тижорат вазирлиги ҳамда бошқа давлат органлари тақдим этган.
2026 йил апрель охирида Европа Иттифоқи Қирғизистонга қарши санкцияларни айланиб ўтишга қарши курашиш воситасини қўллаганди. Ушбу механизм ЕИ томонидан Россияга нисбатан қабул қилинган санкцияларнинг 20-пакети доирасида ишга туширилган. Қирғизистонга экспорт қилиш тақиқланган маҳсулотлар рўйхатига ҳар қандай рақамли дастурли бошқарувга эга ускуналар ва радиоаппаратуралар кирди. ЕИ бу механизм Қирғизистон томонидан айрим ускуналарнинг Россияга экспорт қилинишини олдини олиш бўйича талаблар «тизимли ва қайта-қайта бажарилмагани» сабабли фаоллаштирилганини маълум қилган.
Қирғизистон Ташқи ишлар вазирлиги бунга жавобан мамлакатга нисбатан санкцияларни айланиб ўтишга қарши механизм қўлланганидан афсусда эканини билдирган. Вазирлик «қирғиз томонининг позицияси инобатга олинмай қолаётганини» ва бу каби «бир томонлама қарорлар ишонч муҳитига путур етказишини» таъкидлаган.
Қирғизистон бош вазири Адилбек Касималиев бундан аввал ўз мамлакати Россияга қарши «чекловларни айланиб ўтишда иштирок этмаётганини» баён қилганди. Унинг сўзларига кўра, Қирғизистон ЕИ, АҚШ ва Буюк Британиянинг санкциялари рўйхатига тушган маҳаллий банкларни текшириш учун халқаро аудиторлик компанияларига мурожаат қилган.
