АҚШ президенти Дональд Трамп Форс кўрфази давлатларининг сўровига кўра, 19 майга режалаштирилган Эронга қарши зарбаларни кечиктирганини маълум қилди.

«Қатар амири Тамим бин Ҳамад Ол Соний, Саудия Арабистони валиаҳд шаҳзодаси Муҳаммад бин Салмон Ол Сауд ва БАА президенти Муҳаммад бин Заид Ол Наҳайён мендан Эронга қарши эртага режалаштирилган ҳужумимизни қолдиришни сўради, чунки ҳозир жиддий музокаралар кетмоқда ва уларнинг буюк раҳбар ҳамда иттифоқчи сифатидаги фикрига кўра, келишувга эришилади», — деб ёзди Трамп ўзининг Truth Social ижтимоий тармоғида.

Оқ уй раҳбарининг қўшимча қилишича, келишув АҚШ учун «тўлиқ мақбул» бўлади ва у Эроннинг ядровий қурол яратишдан воз кечишини ўз ичига олади.

«Ушбу раҳбарларга бўлган ҳурматим юзасидан мен Пентагон раҳбари Пит Хегсет, Штаб бошлиқлари бирлашган қўмитаси раиси Дэн Кейн ва АҚШ Қуролли кучларига эртага Эронга ҳужум қилинмаслиги бўйича кўрсатма бердим. Аммо шу билан бирга, агар мақбул келишувга эришилмаса, биринчи буйруқ билан Эронга қарши тўлиқ миқёсли кенг қамровли ҳужум бошлашга тайёр туришни топширдим», — дея таъкидлади Трамп.

АҚШ ва Исроил Эронга қарши ҳарбий ҳаракатларни қайта бошлашга тайёргарлик кўраётгани ҳақидаги хабарлар сўнгги кунларда Трампнинг риторикаси кескинлашгани фонида пайдо бўлди. Ўтган якшанба куни АҚШ президенти Теҳронга зарбалар қайта тикланиши билан таҳдид қилиб, келишувга эришиш учун «вақт оз қолаётганини» айтган эди.

Кейинроқ бўлиб ўтган матбуот анжуманида Трамп АҚШнинг Эронга берадиган зарбалари икки-уч кунга тўхтатиб турилганини маълум қилди.

«Саудия Арабистони, Қатар, БАА ва бошқа бир қатор мамлакатлар мендан ҳужумни икки-уч кунга, қисқа муддатга қолдиришни сўради, чунки улар келишувга эришишга жуда яқин турибмиз деб ҳисобламоқда», — деди АҚШ президенти.

  • АҚШ ва Исроил Эронга қарши урушни 28 февралда бошлаган эди. Кўп ўтмай, Теҳрон жаҳон нефтининг 15−20 фоизи ўтадиган Ҳурмуз бўғзини тўсиб қўйди. Кейинроқ Вашингтон Эрон портларини блокада қилиш бошланганини эълон қилди. 8 апрель куни АҚШ ва Эрон вақтинчалик сулҳ тузди ва у ҳозирча кучида қолмоқда.