Gazeta ўрганган Миллий статистика қўмитаси маълумотларига кўра, Ўзбекистон апрель ойида ўтган йилнинг сентябридан буён илк бор олтин экспорт қилди.
Январь-апрель ойлари якунларига кўра, Ўзбекистон ташқи савдо айланмаси ўтган йилнинг шу даврига нисбатан 5,8 фоизга ошиб, 26,3 миллиард долларни ташкил этди. Экспорт 16,8 фоизга камайиб, 10 миллиард долларни, импорт эса 26,7 фоизга ўсиб, 16,4 миллиард долларни ташкил қилди. Савдо тақчиллиги 6,38 миллиард долларга етди (2025 йилнинг январь-апрель ойларида бу кўрсаткич 930,2 миллион доллар бўлган эди).
Шу билан бирга, олтинни ҳисобга олмаганда, экспорт 30,3 фоизга — 6,5 миллиарддан 8,5 миллиард долларгача ўсди.
Апрель ойида олтин экспорти 1,5 миллиард долларга етди. Унгача қимматбаҳо металлнинг ташқи бозорларга охирги етказиб берилиши 2025 йилнинг сентябрь ойида — 1,475 миллиард доллар миқдорида қайд этилганди.
Шу тариқа, Ўзбекистон олтинни хорижга сотишдаги олти ойлик танаффусга чек қўйди.
Экспорт қимматбаҳо металнинг жаҳон бозоридаги нархлари тебраниши фонида қайта тикланди. Март ойидаги пасайишдан сўнг олтин котировкалари яна ўсишга ўтди. Апрель ойи охирига келиб, олтиннинг халқаро нархи бир унция учун тахминан 4625 долларни ташкил этди (бир ойда +1,6%). Шу билан бирга, май ойи охирига келиб, олтин нархи 4500 доллардан пастлади.
Эслатиб ўтамиз, апрель ойи якунларига кўра, Ўзбекистоннинг олтин-валюта захиралари 70,9 миллиард долларгача ўсди. Ўзбекистон Марказий банки халқаро захиралари таркибидаги олтин қиймати 743,6 миллион долларга ошиб, 61,6 миллиард долларга етди. Бунда олтин захираларининг физик ҳажми 13,4 миллиондан 13,32 миллион трой унциясигача қисқарди. Олтин мамлакат барча захираларининг қарийб 86,9 фоизини ташкил этади.
Олтиннинг мамлакат иқтисодиёти учун аҳамияти
Олтин Ўзбекистон иқтисодиётида муҳим ўрин тутади — у асосий экспорт товарларидан бири ва валюта тушумларининг муҳим манбаи ҳисобланади. Айрим йилларда у мамлакат экспортининг салмоқли улушини ташкил этган, сотувдан тушган даромадлар эса савдо тақчиллигини қоплаш ва тўлов балансини қўллаб-қувватлашга хизмат қилган.
Бундан ташқари, олтин стратегик активдир: унинг захиралари Марказий банкнинг халқаро резервларини шакллантириб, миллий валюта ва молия тизими барқарорлигини таъминлайди. Йирик конлар ва қазиб олиш ҳажми (хусусан, НКМК каби корхоналар орқали) туфайли Ўзбекистон жаҳон олтин бозоридаги эътиборга молик ўйинчилардан бири ҳисобланади.
Шунингдек, 2025 йилда олтин савдосидан олинган қўшимча даромадлар солиқ тушумларининг муҳим манбаига айланди, бунинг натижасида ҳукумат ўз харажатларини 41,2 триллион сўмга (3,43 миллиард доллар) оширди.