Апрель ойи якунларига кўра, Ўзбекистонда қарийб 3 миллиард кубометр табиий газ қазиб олинди. Бу Статистика агентлигининг Gazeta ўрганиб чиққан ҳисоботидан келиб чиқмоқда.
Қазиб олинган ҳажм ўтган йилнинг апрель ойига нисбатан 18,8 фоизга (деярли 700 миллион кубометрга) кам. Газ ишлаб чиқаришнинг пасайиши ўтган йилнинг охиридан бошлаб тезлашган.
Йил бошидан буён (январь-апрель ойларида) қазиб олиш ҳажми тахминан 12,6 млрд кубометрни ташкил этди, бу ўтган йилнинг дастлабки тўрт ойидагига қараганда 16 фоизга ёки 2,4 млрд кубометрга кам демак. 2019 йилнинг шу даври (20,8 млрд) билан солиштирганда эса қисқариш 8,2 млрд кубометрни ташкил қилди.
Эслатиб ўтамиз, Ўзбекистонда генерацияда газнинг улуши аста-секин камайиб бораётган бўлса-да, электр энергиясининг 65−70 фоизи газ ёқиш ҳисобига ишлаб чиқарилади.
Энергетика вазири Жўрабек Мирзамаҳмудов аввалроқ Gazeta`га берган интервюсида пасайиш кутилган ҳолат бўлганини, ҳозирда асосий вазифа қазиб олишни барқарорлаштириш ва мавжуд ҳажмларни сақлаб қолишдан иборат эканини айтганди.
Электр энергияси
Тўрт ойлик умумий электр энергияси ишлаб чиқариш ҳажми ўтган йилнинг январь-апрель ойларига нисбатан 3,1 фоизга (896,9 млн кВт/соат) ошиб, 29,9 млрд кВт/соатни ташкил этди.
Шу билан бирга, ойлик солиштирувда апрель ойида ишлаб чиқариш ҳажми 6 фоизга камайиб, 6,9 млрд кВт/соатга тушган.
Аксарияти газ (шунингдек, кўмир ва гидроэнергия) билан ишлайдиган йирик энергия таъминоти корхоналарида электр энергияси ишлаб чиқариш январь-апрель ойларида 6,2 фоизга камайди ва 20,5 млрд кВт/соатни ташкил қилди.
Ушбу йўқотишлар кичик корхоналар (жумладан, қуёш ва шамол электр станциялари, шунингдек, ГЭСлар) томонидан электр энергияси ишлаб чиқариш ҳисобига қопланмоқда — 9,3 млрд кВт/соат, бу 2025 йилнинг январь-апрель ойларидагига нисбатан 31,7 фоизга кўп.
Энергетика вазирлиги маълумотларига кўра, ушбу даврда йирик қуёш ва шамол электр станциялари 3,4 млрд кВт/соат электр энергияси ишлаб чиқарган бўлиб, бу ўтган йилнинг шу даврига нисбатан 794,4 млн кВт/соатга ёки 32 фоизга кўп демак. Бунда қуёш фотоэлектр станциялари (ФЭС) ҳиссасига 1,88 млрд кВт/соат, шамол электр станциялари (ШЭС) ҳиссасига эса 1,54 млрд кВт/соат тўғри келди.
Тўрт ой ичида «яшил» энергетиканинг умумий генерациядаги улуши 11,4 фоизга, фақат апрель ойининг ўзида эса 14,8 фоизга етди.
Нефть
Апрель ойида нефть қазиб олиш ҳажми 51,7 минг тоннагача камайди (2025 йилнинг апрелига нисбатан 3,4 фоизга кам).
Тўрт ой ичида нефть ишлаб чиқариш 209 минг тоннагача қисқарди (-2,5%).
Бензин
Апрель ойида 104,3 минг тонна автомобиль бензини ишлаб чиқарилди, бу 2025 йилнинг апрель ойига нисбатан 21,7 фоизга кўп.
Тўрт ойлик солиштирувда ўсиш 7,1 фоизни ташкил этди — 417,5 минг тонна (+27,5 минг тонна).
Дизель
Бир ой ичида дизель ёнилғиси ишлаб чиқариш 199 минг тоннагача ошди (ўтган йилнинг апрелига нисбатан +38,9%).
2024 йилнинг январь-апрель ойлари билан солиштирганда (йилдан-йилга) 17,1 фоизлик ўсиш кузатилмоқда — 381 минг тонна.
Кўмир
Бир ойлик кўмир қазиб олиш ҳажми кескин камайди — 200 минг тоннагача (-64,1%). Йил бошидан буён эса ишлаб чиқариш 27,7 фоизга пасайиб, 1,3 млн тоннани ташкил этди.