Россия реактив двигателлар учун ёнилғи экспортига вақтинчалик тақиқ жорий этди. Мамлакат ҳукуматининг тегишли қарори 30 май куни қабул қилинди.
Россиядан реактив двигателлар учун ёнилғини, жумладан, биржа савдоларида харид қилинган ёнилғини олиб чиқишга бўлган вақтинчалик тақиқ 2026 йил 30 ноябрга қадар (шу куни ҳам) амал қилади. Қабул қилинган қарорнинг мақсади «ички ёнилғи бозоридаги вазиятни барқарорлаштириш» деб кўрсатилган.
Истиснолар ҳаво кемалари томонидан йўл давомида фойдаланиладиган технологик сиғимлардаги ёнилғига, вақтинчалик чеклов тўғрисидаги қарор кучга киргунга қадар божхона тартиб-таомилига расмийлаштирилган авиакеросин партияларига, шунингдек, ҳукуматлараро битимлар доирасидаги етказиб беришларга тааллуқлидир.
Энергетика вазирлиги матбуот хизматининг Spot нашрига аниқлик киритишича, Россия томонидан авиаёнилғи экспортига киритилган тақиқ Ўзбекистонга бўлган етказиб бериш ҳажмига таъсир қилмайди. Вазирлик икки давлат ўртасида амалда бўлган ҳукуматлараро битим мавжудлигини қўшимча қилди.
Бундан ташқари, Россия 1 апрелдан бошлаб «нархларни барқарорлаштириш ва ички бозорни биринчи навбатда таъминлаш» мақсадида бензин экспортини ҳам тақиқлаган. Бу чеклов 31 июлгача амал қилади ва бозорнинг барча иштирокчиларига тааллуқли. Аввалги ўхшаш тақиқлар ҳам ҳукуматлараро битим туфайли Ўзбекистонга таъсир қилмаганди.
26 май куни Шавкат Мирзиёев транспорт инфратузилмасини ривожлантириш тақдимоти билан танишиб, фуқаро авиацияси корхоналарини авиаёнилғи билан таъминлаш масаласини кўриб чиққанди. Ҳозирда мамлакат аэропортларидаги ёнилғи таъминоти комплексларининг умумий ҳажми ҳозирда 49 минг тоннани ташкил этади.
2030 йилгача авиация ёнилғиси ишлаб чиқариш ҳажмини йилига 600 минг тоннага, уни сақлаш қувватини эса 80 минг тоннага етказиш режалаштирилмоқда. Бу мақсадларга эришиш учун Навоий, Андижон, Бухоро, Урганч халқаро аэропортлари ҳамда Янги Тошкент халқаро аэропортида янги ёнилғи омборлари қуриш кўзда тутилмоқда.
