Ўзбекистонда маиший кимё маҳсулотларини мажбурий маркировкалаш жорий этиш режалаштирилмоқда. Бу ҳақда 2 июнь куни президент Шавкат Мирзиёев раислигида ўтказилган кимё саноатини ривожлантиришга бағишланган йиғилишда маълум қилинди.
Йиғилишда BCG Group OZ хорижий корхонаси директори Татьяна Рубцова мамлакат бозорида контрафакт маиший кимё маҳсулотлари тарқалиши муаммосига эътибор қаратди.
«Хусусан, энг оммабоп маҳсулотларимиздан бири — ёғни самарали тозалаш воситаси қалбакилаштирилиб, ички бозорда сотилмоқда. Айнан шу маҳсулот кўпинча сохталаштириш объектига айланяпти», — деди Татьяна Рубцова «Ўзбекистон 24» телеканали лавҳасида.
У ички бозордаги контрафакт маҳсулотлар муаммосига жиддий эътибор қаратилишига умид билдирган.
«Чунки бундай маҳсулотлар нафақат маҳаллий ишлаб чиқарувчиларга, балки сифати талабга жавоб бермайдиган маҳсулотни харид қилаётган истеъмолчиларга ҳам зарар етказади», — деди Татьяна Рубцова.
Шунингдек, у маиший кимё маҳсулотларини маркировкалашни жорий этиш ҳақидаги таклиф қўллаб-қувватлангани учун президент Шавкат Мирзиёевга миннатдорлик билдирди.
«Маиший кимё маҳсулотларини мажбурий маркировкалаш ташаббусини қўллаб-қувватлаганингиз ва бу масалага жиддий эътибор қаратганингиз учун самимий миннатдорлик билдираман. Шунингдек, корхонамиз мазкур лойиҳада пилот иштирокчи сифатида қатнашишга тайёрлигини маълум қилмоқчиман. Ушбу ташаббусни амалиётга татбиқ этишга ўз ҳиссамизни қўшишдан мамнун бўламиз», — деди Татьяна Рубцова.
2 июнь куни президент Шавкат Мирзиёев маиший ва автомобиль кимёси маҳсулотлари (Grass, Milana) ишлаб чиқаришга ихтисослашган BCG Group OZ корхонаси фаолияти билан танишди.
Давлат раҳбари матбуот хизмати маълум қилишича, лойиҳа Россиянинг Grass компанияси билан ҳамкорликда 4 минг квадрат метрдан ортиқ майдонда амалга оширилган. Умумий инвестициялар ҳажми 6 млн долларни ташкил этган бўлиб, ишлаб чиқариш йўлга қўйилиши натижасида 81 та иш ўрни яратилган.
Президентга корхонанинг ишлаб чиқариш кўрсаткичлари ҳақида маълумот берилди. Қайд этилишича, 2025 йилда бу ерда 176 млрд сўмлик маҳсулот ишлаб чиқарилган. Бюджетга 3,7 млрд сўм солиқ тўланган, экспорт ҳажми эса 2,6 млн долларга етган.
Татьяна Рубцова ишлаб чиқаришни жойлаштириш учун айнан Ўзбекистон танланганига изоҳ берар экан, бунга мамлакатда тақдим этилган имтиёзли шарт-шароитлар ҳам омил бўлганини таъкидлади.
«Ишлаб чиқариш майдонимизни жойлаштириш учун Ўзбекистонни танладик, чунки бизга жуда қулай имтиёзли шартлар тақдим этилди. Хусусан, киритилган инвестициялар ҳажмига қараб бериладиган имтиёзлардан фойдаландик. 5 млн доллардан ортиқ инвестиция киритилганда фойда солиғидан озод қилиш имконияти мавжуд. Бу биз учун муҳим омиллардан бири бўлди. Чунки биз маҳаллий ишлаб чиқаришни йўлга қўйиб, импорт ўрнини босувчи маҳсулотлар ишлаб чиқаришни ташкил этдик ва бу ерда ўз филиалимизни очдик», — деди Татьяна Рубцова.
Корхона директори Татьяна Рубцованинг сўзларига кўра, компания Марказий Осиё бозорларига алоҳида эътибор қаратмоқда.
«Айнан шу бозорларга катта урғу бердик, чунки маҳсулотларимиз Марказий Осиё мамлакатларида катта талабга эга. Ҳозирда экспортимизнинг тахминан 50 фоизи ушбу давлатлар ҳиссасига тўғри келади», — деди у.
Татьяна Рубцова президент билан учрашувни корхона учун «кучли туртки» деб баҳолади.
«Бугунги президент билан учрашув биз учун кучли туртки бўлди. Биз бу воқеага жуда пухта тайёргарлик кўрдик, чунки бундай учрашув биринчи марта бўлмоқда ва бу биз учун катта шараф эди. Шунингдек, корхонамиз дуч келаётган муаммоларни давлат раҳбарига бевосита етказиш имконияти яратилгани учун ҳам миннатдормиз. Корхонамиз учун асосий муаммолардан бири — контрафакт маҳсулотлардир. Президент бизни қўллаб-қувватлади ва энди маиший кимё маҳсулотлари бозорида мажбурий маркировкани жорий этиш орқали бу йўналишда иш олиб борамиз», — деди Татьяна Рубцова.
Ўзбекистонда маҳсулотларни рақамли маркировкалаш ва кузатиб бориш тизими 2019 йилдан жорий этила бошланган. Дастлаб тамаки ва алкоголь маҳсулотлари, кейинчалик дори воситалари ҳамда маиший техника воситалари мазкур тизимга киритилган. Тизимнинг эксклюзив оператори — CRPT Turon.
Компания Россиядаги «Честный знак» товарларни маркировкалаш тизимининг ягона оператори ҳисобланган Перспектив технологияларни ривожлантириш маркази томонидан ташкил этилган. Ҳозирда компания акциялари Digital Holding ҳамда Давлат активларини бошқариш агентлигига тегишли. Digital Holding эса тадбиркор Алишер Усмонов билан боғлиқ компаниялар томонидан назорат қилинади.
Сув ва ичимликлар учун маркировкани жорий этиш муддати бизнес вакилларининг эътирозлари ҳамда соҳадаги муаммолар сабаб бир неча бор кечиктирилган. Аввал 2022 йил октябридан 2023 йил 1 июлга, кейин 2024 йил 1 мартга кўчирилган бўлса, сўнгги марта ушбу талабни жорий этиш муддати 2027 йил 1 апрелга қадар узайтирилган.