Gazeta ва Дмитрий Поваров футбол бўйича ЖЧ-2026 иштирокчиларини ўқувчиларга таништиришни «I» гуруҳи билан давом эттиради. Унда Франция ва Сенегал терма жамоалари 2002 йилнинг ремейкини ўйнайди, Норвегия жамоаси тинимсиз рақиблар мудофаасини «тешиб» ўтишга уринади, Ироқ футболчилари эса ўзларининг жисмоний тайёргарлигига таяниб майдонга тушади.
Gazetaʼнинг «I» гуруҳи бўйича башорати
Франция
Досье. Франция терма жамоаси — икки карра жаҳон чемпиони (1998, 2018), Жаҳон чемпионатида 17-марта иштирок этмоқда. Қатарда ўтган 2022 йилги биринчиликнинг кескин кечган финалида «учранглилар» Аргентина жамоасига пенальтилар сериясида имкониятни бой берганди. Французлар бу галги саралаш босқичидан ишончли ўтиб, «D» гуруҳида биринчи ўринни эгаллади: 18 имкониятдан 16 очко жамғарди — бешта ғалаба ва фақат битта дуранг. Терма ФИФА рейтингида 1-ўринда бормоқда.
Жамоанинг фойдасига: Мураббий Дидье Дешам терма жамоани 2012 йилдан буён бошқариб келмоқда ва бу чемпионат унинг учун хайрлашув чемпионати бўлади. Албатта, у ўз фаолиятини яна бир жаҳон кубоги билан якунлашни истайди. 4−2−3−1 схемасида ўйин тизгини Майкл Олисега («Бавария») топширилган, Вильям Салиба («Арсенал») мудофаадаги асосий фигурага айланган, олдинги чизиқда эса Килиан Мбаппенинг («Реал Мадрид») тезлиги ва 2025 йилги «Олтин тўп» соҳиби Усмон Дембеленинг («ПСЖ») майдонни кўра олиш қобилияти бирлашиб, рақиб учун деярли уддалаб бўлмас вазифани юзага келтиради.
Жамоанинг зарарига: Ушбу супержамоанинг заиф томонларидан сўз юритиш зийракликдан кўра кўпроқ тасаввурни талаб қилади. Хўп, келинг, тасаввур қилиб кўрамиз. Майк Меньян («Милан») асосий дарвозабон мақомини ўзиники қилиб олганига қарамай, маҳорат борасида ўтган йиллардаги француз посбонларидан ортда қолади. Уоррен Заир-Эмери («ПСЖ»), Райан Шерки («Манчестер Сити») ва Орельен Чуамени («Реал Мадрид») жуда иқтидорли, бироқ ҳал қилувчи баҳсларда ўйин суръатини бошқариш учун уларга доим ҳам барқарорлик ва тажриба етишмайди. Французлар «асосий таркиби»нинг деярли барча ўйинчилари нафақат тўлиқ мавсумни ўтказишди, балки бутун бу вақт давомида клуб юкини ўз елкаларида кўтариб юришди ва, эҳтимол, анча толиқиб қолишган.
Opta компьютери башорати:
- гуруҳдан чиқиш — 95,25%;
- финалга чиқиш — 20,70%;
- чемпионлик — 12,67%.
Gazeta башорати. Франция бўлажак чемпионатда фақат чемпионлик мақоми ҳақида ўйлайди. Норвегия билан ўйин «учранглилар» мудофаасини қарши ҳужумларда бироз бўшаштириб қўйиши мумкин, бироқ ўша пайтга келиб, катта эҳтимол билан ҳар икки жамоа ҳам гуруҳдан чиқиш вазифасини ҳал қилиб бўлган бўлади. Ҳақиқий имтиҳон плей-офф босқичида бошланади — 1/8 финалдан аввал эмас. У ерда бизни «E» гуруҳининг эҳтимолий ғолиби (Германия) билан учрашув кутади.
Сенегал
Досье. Сенегал учун бу — тўртинчи Жаҳон чемпионати. Терма жамоанинг 2002 йилдаги дебюти сенсацияга айланган — жамоа чорак финалгача етиб борган. ЖЧ-2018ʼдаги муваффақиятсизликдан сўнг Қатардаги биринчиликда Африка жамоаси яна гуруҳдан чиқишга муваффақ бўлди, лекин дастлабки ўйиндаёқ инглизлар бу жамоага ҳеч қандай имконият қолдирмади (0:3). Жорий саралаш босқичида терма жамоа ўз гуруҳидаги 10 та ўйинда бирор марта ҳам мағлубиятга учрамади ва уч марта дуранг қайд этди. ФИФА рейтингида 14-ўринда бормоқда.
Жамоанинг фойдасига: «Теранга шерлари» сўнгги йилларда ўз «ўргатувчиларини» деярли тан олмаяпти. 44 ёшли янги мураббий Папе Тиав етук, барқарор, жисмонан бақувват ва яхши мувозанатлашган жамоани тузди. Бўлажак мундиал спортдаги фаолиятида охиргиси бўлиши мумкин бўлган 34 ёшли Садио Мане («Аль-Наср») терма жамоанинг сўзсиз етакчиси бўлиб қолмоқда. Терма жамоа дарвозабони Эдуард Менди («Аль-Аҳли») Африка Кубоги плей-офф босқичида «қуруқ» серияни таъминлади. Калиду Кулибали («Аль-Ҳилол») эса икки Жаҳон чемпионати қатнашчиси бўлган жуда тажрибали ҳимоячи. Фамилиядошлар бўлган Идрисса ва Папа Гейе («Эвертон», «Вильярреал») ўта муҳим фигуралар бўлса, Иброҳим Мбайе (ПСЖ) энди муҳим фигурага айланиши кутилмоқда.
Жамоанинг зарарига: Терма жамоанинг асосий ўйинчилари — Исмоил Сарр («Кристал Пэлас») ва Ассан Диао («Комо») жиддий жароҳатлардан сўнг тикланиш жараёнида ва ўйин амалиёти етишмовчилигини ҳис қилмоқда. Бундан ҳам хавотирлироғи Африка Кубогидаги можароли вазиятлар бўлиб, бу энг ноқулай паллада ўз таъсирини кўрсатиши мумкин. Марокашга қарши ғалаба қозонилган финалда бўлгани каби, бутун жамоанинг майдонни тарк этиши — жамоа ичидаги тартибсизлик белгисидир. «Шерлар»нинг ҳакам билан баҳслашиш одати бор, бироқ ЖЧда бунинг бадали тез ва оғир бўлади.
Opta компьютери башорати:
- гуруҳдан чиқиш — 61,58%;
- финалга чиқиш — 2,30%;
- чемпионлик — 0,56%.
Gazeta башорати. Агар «шерлар» мусобақа жадвалида бурчакка тақалиб қолмаганида, уларнинг янги сенсация қайд этишини башорат қилиш мумкин эди — қолаверса, бунга 2002 йилгидан кам бўлмаган асослар бор. Жамоа илк ўйинини Франция терма жамоасига қарши ўтказади — бу 24 йиллик тарихга эга ўйиннинг ўзига хос ремейки бўлиб, унда «учранглилар», шубҳасиз, реванш олишга уринади. Норвегия билан учрашув — гуруҳ ичидаги ҳақиқий плей-офф. Агар суръат ва асабий босимга бардош бера олса, улар яна кейинги босқичга чиқиши мумкин.
Норвегия
Досье. Норвегия терма жамоаси ҳам 1998 йилдан бери илк бор ўзининг тўртинчи Жаҳон чемпионатига йўл олмоқда. Ўшанда «пармалар» ўзларининг ҳозиргача энг яхши натижасига эришган — 1/8 финалга чиққан ва бу босқичда норвегияликлар Италияга минимал ҳисобда (0:1) имкониятни бой берган. Норвегиянинг жорий саралаш босқичида айнан италияликларга қарши ўтказилган икки ўйини ҳал қилувчи бўлди. Бу ўйинларда скандинавияликлар рақиб мудофаасини том маънода «тешиб ўтди»: ўз майдонида 3:0 ва Миланда 4:1 ҳисобида рақибини шармандали тарзда мағлуб этди. ФИФА рейтингида 31-ўринда.
Жамоанинг фойдасига: Мураббий Столе Сольбаккен жамоаси — майдондаги қатъий геометрия ва куч тимсоли. Сўнгги мавсумларда Англия Премьер Лигасининг энг кучли футболчиларидан бири — бу гол машинаси Эрлинг Ҳоланд («Манчестер Сити»): терма жамоа сафида 48 ўйинда 55 та гол урган. Ҳужумда унга Ла Лигадаги энг яхши мавсумини ўтказаётган Александр Сёрлот («Атлетико Мадрид») ёрдам беради. Шунингдек, жамоада шиддаткор вингерлар Антонио Нуса («Лейпциг») ва Оскар Бобб («Фулҳэм») ҳам бор. Рақиб ҳужумларини бартараф этишда эса Сандер Берге («Фулҳэм») яхши ҳаракат қила бошлади.
Жамоанинг зарарига: Ҳимоячи Торбьорн Ҳеггемнинг («Болонья») эски жароҳати қайталангани ва Давид Волфенинг («Вулверҳэмптон») ўз клубида захира ўриндиғига михланиб қолгани ҳимоя марказини анча заифлаштириб қўйди. Норвегияликлар ҳужумларининг бош меъмори — бу мавсумда жароҳатлардан тинкаси қуриган Мартин Эдегорнинг («Арсенал») тайёр ёки тайёр эмаслиги ҳам сўроқ остида. Мудофаанинг сўнгги чизиғи ҳам кишини ўйлантиради: асосий дарвозабон Эрьян Нюланд «Севилья»даги ўрнини йўқотган.
Opta компьютери башорати:
- гуруҳдан чиқиш — 82,71%;
- финалга чиқиш — 7,36%;
- чемпионлик — 3,24%.
Gazeta башорати. Норвегияликларнинг ўйинлар жадвали борасида омади келди: улар тезликни ошириб, тўплар нисбатини яхшилаб олиш учун мусобақани Ироққа қарши ўйин билан бошлайди. Гуруҳдаги иккинчи ўрин учун ҳал қилувчи баҳс Сенегал билан кечади. Унда скандинавияликлар қаттиқ прессинг ва шиддатли жисмоний курашларга дуч келади. Франция билан ўйин эса биринчи ўрин учун курашга айланиб кетиши мумкин. Агар Ҳоланд ўз ўйинини топиб олса, «пармалар» бу қатламни ҳам тешиб ўтишга қодир.
Ироқ
Досье. Ироқ терма жамоаси ўз тарихида иккинчи марта Жаҳон чемпионатига бормоқда. «Месопотамия шерлари» илк бор 1986 йилги мундиалга йўл олиб, барча учта ўйинда мағлуб бўлган ва ҳеч нарса билан ёдда қолмаган. Орадан қарийб 40 йил ўтиб, ироқликлар 21 ўйиндан иборат ҳолдан тойдирувчи марафонни муваффақиятли якунлаб, март ойидаги плей-оффда Боливияни 2:1 ҳисобида енгиб, яна Жаҳон чемпионати йўлланмасини қўлга киритди. ФИФА рейтингида 57-ўринда.
Жамоанинг фойдасига: ЖЧ-2026 йўлланмасини қўлга киритгани — Ироқнинг омади. Бироқ «омад ҳаракат қилганга кулиб боқади»: австралиялик Грэм Арнольд жамоасининг асосий устунликлари — атлетизм, зичлик ва жамоавий ҳамжиҳатлик. Асосий юлдузлари — «Абу Тубар» (болтали одам) лақабли 30 ёшли ҳужумчи Айман Ҳусайн («Аль-Карма»). «Болта» тиғининг ўткирлиги учун ярим ҳимоячилар Зидан Иқбол («Утрехт») ва Амир аль-Аммари («Краковия») масъул. Ҳусайннинг шериги эса 24 ёшли Али аль-Ҳамади («Ипсвич Таун») ҳисобланади.
Жамоанинг зарарига: Ироқлик мухлисларни энг кўп хавотирга солаётган жиҳат — дарвозабонлар чизиғи: 35 ёшли асосий посбон ва жамоанинг кўп йиллик сардори Жалол Ҳасан («Аль-Завра») жиддий жароҳатдан кейин қайдномага киритилган. Асосий ҳимоячи Аҳмад Яҳё («Аль-Шорта») ва истиқболли вингер Юсуф Амин («Ларнака») ҳам тикланиш билан боғлиқ муаммоларга дуч келмоқда. Агар гуруҳ ўйинлари давомида жароҳатлар барибир ўз сўзини айтса, гуруҳдаги қолган уч рақибга қарши биргина ирода ва жисмоний ҳолат билан узоққа бориб бўлмайди.
Opta компьютери башорати:
- гуруҳдан чиқиш — 27,27%;
- финалга чиқиш — 0,28%;
- чемпионлик — 0,06%.
Gazeta башорати. Орадан 40 йил ўтса-да, ироқликларнинг кадрлар захираси ҳамон чекланган ва улар бу галги мундиалда Жаҳон чемпионатларидаги аввалги энг юқори натижаси — финал турнирларининг гуруҳ босқичидан ўта олмайди. Ироқликлар учун ҳал қилувчи баҳс, катта эҳтимол билан, Сенегалга қарши кечади. Бу ўйинда улар ё сенсация қайд этиши, ё чемпионат билан расман хайрлашиши керак бўлади.
Ўйинлар жадвали
