MobiUz мобил операторининг 100 фоиз давлат улуши АҚШнинг McKim and Company компанияси бошчилигидаги молиявий инвесторлар ва технологик ҳамкор JVR Enterprises LLC иштирокидаги консорциумга 351 млн долларга сотилди. Бу ҳақда Давлат активлари агентлиги хабар қилди.
Қайд этилишича, хусусийлаштириш дастурларига мувофиқ ташкил этилган жараёнда халқаро инвестиция банки Rothschild & Co стратегик маслаҳатчи, KPMG молиявий маслаҳатчи, Deloitte эса мустақил баҳоловчи сифатида жалб этилган.
Савдо жараёни халқаро бозорларда кенг тарғиб қилинган. Маслаҳатчиларнинг глобал офислари орқали 100 дан ортиқ стратегик ва молиявий инвестор билан индивидуал музокаралар ўтказилган. Битим ҳақидаги маълумотлар Bloomberg ва Financial Times каби халқаро нашрларда ёритилган ҳамда инвесторлар учун халқаро роад-шоw тадбирлари ташкил этилган.
Натижада АҚШ, Япония, Форс кўрфази давлатлари, Европа ва Кавказорти минтақасидан 15 дан ортиқ инвестор жараёнда қатнашган. Уларнинг 10 нафари дастлабки нарх таклифларини тақдим этган.
Потенциал харидорларга халқаро стандартлар асосида тайёрланган молиявий ва ҳуқуқий таҳлиллар (due diligence) тақдим этилган. Шундан сўнг олти нафар иштирокчидан MobiUzни сотиб олиш бўйича мажбурий кучга эга якуний таклифлар (Binding Offer) қабул қилинган.
Давлат активлари агентлиги маълумотига кўра, давлат учун энг юқори иқтисодий самарадорликка эришиш мақсадида якуний босқичда иштирокчиларга нарх таклифларини яхшилаш имконияти ҳам берилган.
Савдолар якунида АҚШнинг McKim and Company компанияси бошчилигидаги молиявий инвесторлар ва технологик ҳамкор JVR Enterprises LLC иштирокидаги консорциум ғолиб деб топилди. Консорциум таклифига кўра, MobiUz қиймати 351 млн доллар этиб баҳоланган. Бундан ташқари, компания телекоммуникация инфратузилмасини ривожлантириш учун 500 млн долларгача инвестиция киритишни режалаштирмоқда.
Агентлик битим самарадорлигини кўрсатувчи EV/EBITDA мультипликатори 7,4х ни ташкил этганини қайд этди. Таъкидланишича, бу кўрсаткич қиёсий битимларга нисбатан компаниянинг рақобатбардош баҳоланганини ҳамда мустақил баҳоловчи аниқлаган қийматдан сезиларли даражада юқорилигини кўрсатади.
Битим кучга кириши учун тегишли тартибга солувчи органларнинг рухсатномаларини олиш, шунингдек, белгиланган корпоратив ва ҳуқуқий тартиб-таомилларни якунлаш талаб этилади.
Universal Mobile Systems 2014 йилда Россиянинг МТС (50,01%) ва Радиоалоқа, радиоэшиттириш ва телевидение маркази (49,99%) ўртасида қўшма корхона сифатида, аввалроқ МТС’нинг шуъба корхонаси бўлган «Уздунробита» компаниясига тегишли бўлган инфратузилма асосида ташкил этилган эди.
2016 йилнинг августида МТС компаниядаги улушини РРТМга сотган. 2018 йил ноябрь ойидан бошлаб давлатга тегишли «Рақамли ишонч» Рақамли иқтисодиётни ривожлантиришни қўллаб-қувватлаш жамғармаси операторнинг 100% эгасига айланган. 2019 йил декабрь ойида UMS ребрендинг ўтказди ва ўз номини Mobiuz’га ўзгартирган.
2020 йилда Mobiuz’ни хусусийлаштиришга тайёрлаш режалари эълон қилинди. Орадан бир йил ўтиб, Mobiuz’ни 2023 йилнинг апрелигача хусусийлаштириш режалаштирилганди. Ушбу компаниядаги давлат улушини сотиш вазифаси президентнинг 2025 йил 21 апрелдаги қарорида ҳам белгиланган.