Ўзбекистонда туғилган Нодира Мансурова Европа тикланиш ва тараққиёт банкининг Қирғизистон, Тожикистон ва Туркманистон бўйича минтақавий раҳбари этиб тайинланди. У янги лавозимида ишни 2026 йил 1 сентябрдан бошлайди ва Бишкек шаҳрида фаолият юритади.
У Европа тикланиш ва тараққиёт банкидаги меҳнат фаолиятини 2001 йилда бошлаган. Шу вақтдан буён банкнинг Лондондаги бош қароргоҳи, шунингдек, Миср, Иордания ва Ўзбекистондаги ваколатхоналарида турли лавозимларда ишлаган.
Нодира Мансурова аввал ЕТТБнинг Марказий Осиёда кичик ва ўрта бизнесни молиялаштириш ва ривожлантириш бўйича минтақавий раҳбари сифатида ҳам фаолият юритган. Бу лавозимда у Алмати шаҳрида ишлаган. 2021 йилда эса Тунис бўйича ЕТТБ раҳбари этиб тайинланган.
Нодира Мансурова Ўзбекистонда туғилган бўлиб, Буюк Британия фуқароси ҳисобланади. У Ўзбекистондаги Жаҳон иқтисодиёти ва дипломатия университети ҳамда Фарғона политехника университетини тамомлаган.
ЕТТБ тарихида ҳозирча Ўзбекистондан чиққан икки нафар аёл банкнинг юқори раҳбарлик лавозимларида ишлаган. Нодира Мансуровадан ташқари, 2024 йил сентябрида вафот этган Камола Маҳмудова ЕТТБнинг Озарбайжондаги ваколатхонасига раҳбарлик қилган.
