Эрон ва Исроил АҚШ президенти Дональд Трампнинг ҳарбий ҳаракатларни тўхтатиш ҳақидаги чақириғидан сўнг ўзаро зарбаларни тўхтатганликларини эълон қилди, деб хабар бермоқда Reuters.
Шу билан бирга, Теҳрон агар Исроил Ливандаги «Ҳизбуллоҳ» гуруҳига зарбалар беришда давом этса, ҳужумларни қайта тиклаши ҳақида огоҳлантирди.
7 июнь куни кечқурун Исроил армиясининг Байрутдаги «Ҳизбуллоҳ» позицияларига берган ҳаво зарбаларидан сўнг Эрон Исроил шимолини ўққа тутганди. Исроил бунга жавобан Эроннинг ҳарбий ва нефть-кимё объектларига ҳужум қилди. Бу апрель ойидаги ўт очишни тўхтатиш келишувидан кейин мамлакатлар ўртасидаги биринчи ўзаро зарбалар алмашинуви бўлди.
Эрон ва Исроил ўртасидаги кескинлик Вашингтоннинг Теҳрон билан урушни тугатиш бўйича келишувга эришиш борасидаги саъй-ҳаракатларини йўққа чиқариши мумкин эди, деб қайд этади агентлик.
Трамп бир кун аввал Теҳрон ва Тель-Авивни зудлик билан ўт очишни тўхтатишга чақирди. «„Тинчлик“ бўйича якуний музокаралар давом этмоқда, фақат жоҳиллик ёки аҳмоқлик уларга халақит бермаса бўлди», — деб ёзди у Truth Social ижтимоий тармоғида.
АҚШ ва Исроил расмий шахсларининг маълум қилишича, 8 июнь куни Трамп инқирозни муҳокама қилиш учун Исроил бош вазири Биньямин Нетаньяҳу билан телефон орқали мулоқот ўтказган. Исроил расмийсининг сўзларига кўра, Исроил АҚШ президентининг илтимосига биноан Эронга бериладиган зарбаларни тўхтатишга рози бўлган.
АҚШ ва Исроил Эронга қарши урушни 28 февралда бошлаган эди. Кўп ўтмай Теҳрон жаҳон нефтининг 15−20 фоизи ўтадиган Ҳурмуз бўғзини тўсиб қўйди. Кейинроқ Вашингтон Эрон портларини блокада қилиш бошланганини эълон қилди. 8 апрель куни АҚШ ва Эрон вақтинчалик сулҳ тузди, Исроил ҳам уни қўллаб-қувватлади. Эроннинг шартларидан бири Исроилнинг Ливан билан ўт очишни тўхтатиш режимига риоя қилиши эди.
