Шавкат Мирзиёевга 8 июнь куни мис саноатида амалга оширилаётган йирик инвестиция лойиҳаларининг бориши ҳақида ахборот берилди.
Жорий йил март ойида Олмалиқ кон-металлургия комбинатида 3-мис бойитиш фабрикасининг биринчи босқичи ишга туширилган. Қиймати 2,7 млрд доллар бўлган мазкур лойиҳа 196 гектар майдонда жойлашган «Ёшлик-1» конини ўзлаштириш доирасида амалга оширилмоқда.
Фабрика тўлиқ қувватга чиққанидан кейин йилига 60 млн тоннагача рудани қайта ишлаш ва қарийб 900 минг тонна мис концентрати ишлаб чиқариш имкониятига эга бўлади. Лойиҳа тўлиқ ишга туширилгач, комбинатда мис концентрати ишлаб чиқаришнинг суткалик ҳажми 2400 тоннадан 5000 тоннагача ошиши кутилмоқда.
Тақдимотда, шунингдек, 4-мис бойитиш фабрикаси лойиҳасини жадаллаштириш масаласи ҳам кўриб чиқилди. Ҳозирда лойиҳанинг базавий муҳандислик ҳужжатлари тайёрланмоқда, қурилиш майдонида ер ва бурғилаш ишлари олиб борилмоқда. 3-фабрикани барпо этиш тажрибасидан келиб чиқиб, технологик ечимларни мақбуллаштириш ва лойиҳа қийматини 2 млрд долларгача камайтириш режалаштирилган.
Мутасаддиларга зарур ер майдонларини ажратиш, тайёргарлик ишларини давом эттириш, базавий муҳандислик ҳужжатларини белгиланган муддатларда якунлаш ҳамда лойиҳани босқичма-босқич ишга тушириш режасини аниқлаштириш бўйича топшириқлар берилди.
ОКМК бошқарув раиси Абдулла Хурсанов «Ўзбекистон 24» телеканалига берган интервьюсида 16 март куни президентнинг 3-мис бойитиш фабрикасига ташрифидан сўнг ишлаб чиқариш ҳажми суткасига 250 тоннадан 800 тоннагача, яъни уч баравардан кўпроқ ошганини маълум қилди.
Унинг сўзларига кўра, бу 3-мис бойитиш фабрикаси барқарор ишлаётганини кўрсатади.
Шунингдек, 4-фабрика бўйича узоқ муддатда тайёрланадиган технологик ускуналар учун буюртмалар жойлаштирилган, лойиҳа ҳужжатлари ишлаб чиқилмоқда, геология-қидирув ва ер ишлари бошланган.
«Бугун муҳтарам Президентимиз 4-мис бойитиш фабрикаси қурилишини жадаллаштириш бўйича ҳафталик ва ойлик иш режаларини ишлаб чиқиш ҳамда бу жараённи янада тезлаштириш юзасидан топшириқлар берди», — деди ОКМК бошқарув раиси Абдулла Хурсанов.
Абдулла Хурсановнинг маълум қилишича, 3-мис бойитиш фабрикасининг ишга туширилиши ҳисобига жорий йилнинг январь-май ойларида комбинатда 17,5 трлн сўмлик режага нисбатан 25 трлн сўмлик маҳсулот ишлаб чиқарилган.
2021 йил декабрь ойида маълум қилинишича, «Ёшлик-1» кони 11 минг гектар майдонни эгаллайди ва разведка қилинган захиралари ҳажми бўйича энг йирик конлардан бири ҳисобланади. Унда олтин, мис, кумуш, молибден ва селен каби 13 турдаги қимматбаҳо ва ноёб металл захиралари мавжуд. Уларни қайта ишлаш учун ОКМКда 3-мис бойитиш фабрикаси қурилган.
3-мис бойитиш фабрикасига 2021 йил 29 июль куни пойдевор қўйилган.
Лойиҳанинг умумий қиймати дастлаб 4,6 млрд долларга баҳоланган бўлиб, кейинчалик 5,3 млрд долларгача ошган. Бу маблағ конни ўзлаштириш, фабрика ва унга тегишли инфратузилмани қуриш ишларини қамраб олган. Фабриканинг ўзини қуриш қиймати эса дастлаб 2 млрд доллар деб баҳоланган бўлса, якунда 2,7 млрд долларни ташкил этган.
Объект қурилишида Enter Engineering ҳамда Россиянинг «Уралмашзавод» компанияси иштирок этган. Дастлаб фабрикани 2023 йилда, давлат дастурида белгиланган муддатга кўра эса 2023 йил август ойида фойдаланишга топшириш режалаштирилган эди.