Сурхондарё вилоятининг Денов туманида безорилик ва товламачилик билан шуғулланган гуруҳ аъзоларига нисбатан суд ҳукми чиқарилди. Бу ҳақда MY5 телеканалининг «Ҳудуд» дастурида хабар берилди.
Маълум қилинишича, Денов туманида яшовчи 28 ёшли фуқаро яна тўрт нафар шериги билан бирлашиб, «Альфа» номли гуруҳ тузган. Тергов маълумотларига кўра, улар осон даромад топиш мақсадида бир нечта безорилик ва товламачилик жиноятларини содир этган.
Ҳолатлардан бирида гуруҳ аъзолари кўчада бир фуқарони мажбуран автомашинага ўтқазиб, ундан 2500 доллар талаб қилган. Шунингдек, улар жабрланувчининг Labo автомобили калити ва ҳужжатларини олиб қўйган. Воқеа видеога олингани ҳам айтилди.
Яна бир ҳолатда гуруҳ аъзолари танишининг йўл-транспорт ҳодисасига учраганини эшитиб, тез тиббий ёрдам бўлимига борган. У ерда улар жамоат тартибини бузган, фуқаролар ва беморлар тинчлигини издан чиқарган, шифокор ҳамда ҳодиса жойига келган бошқа фуқароларга нисбатан дўқ-пўписа қилган. Гуруҳ аъзолари ички ишлар органлари ходимларининг қонуний ҳаракатларига ҳам фаол қаршилик кўрсатган.
Жиноят ишлари судда кўриб чиқилиб, судланувчиларга турли муддатларга озодликдан маҳрум қилиш жазоси тайинланди. Суд ҳукмига кўра, икки нафар судланувчи 3 йилга, бир нафари 5 йилга, яна икки нафари эса 5 йил 1 ой муддатга озодликдан маҳрум этилди.
Эслатиб ўтамиз, Денов туманида ўзларини «Альфа» деб атаган ва безорилик билан шуғулланган олти нафар жиноий гуруҳ аъзоси қўлга олингани ҳақида январь ойида хабар берилган эди. Ўшанда шифохонадаги ҳолат юзасидан Жиноят кодексининг 277-моддаси 3-қисми «г» банди (Безорилик бир гуруҳ шахслар томонидан) билан жиноят иши қўзғатилган эди.
