Ижтимоий тармоқларда Тошкент шаҳри Учтепа туманида икки ҳайдовчи ўртасидаги зиддият акс этган видео тарқалди. Унда эркак ҳайдовчи видеога олаётган аёлни сўкаётгани ва телефонини олиб қўйиб, унга ташланмоқчи бўлгани акс этган.
Пойтахт Ички ишлар бош бошқармаси хабарига кўра, воқеа 8 июнь куни туманнинг Ҳақиқат кўчасида содир бўлган. 41 ёшли Nexia 3 ҳайдовчиси М.Ш. (эркак) ҳамда 34 ёшли Т.Ф. (аёл) ўртасида йўл ҳаракатидаги келишмовчилик оқибатида жанжал келиб чиққан. Сўнгра эркак ҳайдовчиси жамоат жойида уятли сўзлар билан сўкиниб, жамиятда юриш-туриш қоидаларини қасддан бузган.
Ҳолат юзасидан M.Ш.га нисбатан Маъмурий жавобгарлик тўғрисидаги кодексининг 183-моддаси (Майда безорилик) аломатлари билан маъмурий баённома расмийлаштирилган.
Жиноят ишлари бўйича туман суди томонидан унга нисбатан 15 сутка муддатга маъмурий қамоқ жазоси тайинланди.
«Қизимни боғчага ташладим. Секин орқага юриб чиқётган эдим. Бу киши маҳалла ичида, иккита боғча бор йўлда тез келаётган экан. Нима хато қилган эканман деб, машинамни четга олиб, тушдим. Мен орқага юрганимда ҳам орқамдан юриладиган йўл бор эди. Бу инсон ўтиб кетса бўларди… Бундан баттар сўкинишлар, ҳақоратлар бўлган, телефонимни қўлимдан юлиб олиб, телефонни бермасликлар… Мен эрталабдан бери титраб, ўзимга кела олмаяпман», — деди аёл суддаги кўрсатмасида.
Аёлга ҳимоя ордери ҳам берилган.
«Мен кечирим сўрайман. Бошқа қайтарилмайди бунақа нарса. Ҳурмат қилиб, тўғри юраман. Жаҳлни кейинги сафар уйда жиловлаб, тўғри қилиб, кейин кўчага чиқишни ўрганаман. Бунақа нарса бошқа бўлмайди», — дейди ҳайдовчи.
ИИББ видеоси
