Қозоғистон Россия газининг Ўзбекистон ва Қирғизистонга транзитини оширишни техник жиҳатдан таъминлашга тайёр. Бу ҳақда Қозоғистон энергетика вазири Ерлан Аккенженов журналистларга маълум қилди, деб хабар бермоқда Kapital.kz.
Унинг сўзларига кўра, Қозоғистон томонида зарур инфратузилма аллақачон тайёрлаб қўйилган.
«Бизда бундай имконият бор. Ҳаммаси транспорт инфратузилмасига боғлиқ. Қозоғистон томонида бунинг учун барча нарса тайёр. Энди, билишимча, Россия Ўзбекистон билан мустақил музокаралар олиб бормоқда. Биз транзит мамлакат сифатида буни таъминлашга тайёрмиз», — деди вазир.
Ерлан Аккенженов Россия газининг Қозоғистон орқали минтақа мамлакатларига транзити аллақачон амалга оширилаётганини эслатди. Унинг маълумотларига кўра, Ўзбекистонга «4 миллиард куб метрдан ортиқ газ» етказиб берилмоқда, Қирғизистонга эса тахминан 500 миллион куб метр газ юборилмоқда. «Бу рақамларни аниқ эслайман», — дея таъкидлади у.
Қозоғистон Энергетика вазирлиги раҳбари Россия газини Ўзбекистонга етказиб бериш ҳажмини сезиларли даражада ошириш имконияти ҳам муҳокама қилинаётганини маълум қилди. Шу билан бирга, у бу режалар бўйича расмий тасдиққа эга эмаслигини, чунки музокараларни Москва ва Тошкент олиб бораётганини таъкидлади.
«Билишимча, газ етказиб бериш ҳажмини 11 миллиард куб метргача ошириш ҳақида гап кетмоқда, яъни бу жуда катта ҳажм. Бу мен эшитган маълумотларга асосланади. Менда тасдиқланган ахборот йўқ, чунки музокараларни Ўзбекистон ва Россия томонлари олиб бормоқда», — деди Ерлан Аккенженов.
Россия бош вазири ўринбосари Александр Новак Петербург халқаро иқтисодий форуми доирасида Россия гази етказиб бериш ҳажмини ошириш учун инфратузилмани кенгайтириш масаласи бўйича Ўзбекистон ва Қозоғистон билан музокаралар олиб борилаётганини маълум қилганди.
«Қозоғистон ва Ўзбекистондаги ҳамкорларимиз билан музокаралар, муҳокамалар олиб борилмоқда, шунингдек, совет даврида барпо этилган инфратузилмани кенгайтириш, уни реконструкция қилиш ҳамда Қозоғистон ва Ўзбекистонга қўшимча ҳажмда газ етказиб бериш имкониятларини яратиш бўйича лойиҳалар амалга оширилмоқда», — деди у (ТАСС иқтибоси).
Жамшид Ходжаев ва Александр Новак.
Петербург халқаро иқтисодий форуми доирасида Ўзбекистон бош вазири ўринбосари Жамшид Ходжаев Россия бош вазири ўринбосари Александр Новак ҳамда Алексей Миллер билан учрашувлар ўтказди.
Томонлар нефть ва нефть маҳсулотлари, жумладан, автомобиль бензини, авиация ёнилғиси ва нефтни қайта ишлаш заводлари учун хомашё етказиб бериш, шунингдек, газ соҳасидаги ҳамкорлик масалаларини муҳокама қилди. Шу билан бирга, интеграциялашган атом электр станциясининг биринчи энергия блокини қуриш лойиҳасига алоҳида эътибор қаратилди.
Россия газини Қозоғистон орқали Ўзбекистонга етказиб бериш 2023 йил октябрь ойида Марказий Осиё — Марказ газ қувури орқали реверс режимида бошланган. Дастлабки шартномага кўра, йилига 2,8 миллиард куб метргача газ импорт қилиниши назарда тутилганди.
Миллий статистика қўмитаси маълумотларига кўра, 2025 йилда Россия ва Туркманистондан газ импорти қиймат жиҳатидан 1,2 фоизга қисқариб, 1,65 миллиард долларни ташкил этган.