Футбол бўйича Ўзбекистон терма жамоаси бош мураббийи Фабио Каннаваро ОАВда эълон қилинган, АҚШдаги Нидерландияга қарши ўртоқлик учрашуви олдидан жамоанинг текширувдан ўтказилгани акс этган видеоларга изоҳ берди.
Ўзининг Instagram саҳифасидаги баёнотида у «чалғитувчи сарлавҳалар»ни кўрганини ва «вазиятга ойдинлик киритишга» қарор қилганини таъкидлади.
Каннаваронинг сўзларига кўра, бу стандарт хавфсизлик тартиб-қоидаси бўлган.
«Бу оддий, стандарт текширувлар эди. Одамлар бир нарсани тушунмаяпти: Жаҳон чемпионатида иштирок этувчи миллий терма жамоалар саёҳат қилганда, улар оддий йўловчилар каби аэропорт терминаллари орқали ўтмайди, балки жамоалар учун ажратилган автобусларда тўғридан тўғри перронга олиб борилади», — деб ёзди у.
Бош мураббий оддий йўловчилар терминалда ўтадиган текширувлардан терма жамоа аъзолари тўғридан тўғри перроннинг ўзида ўтишини тушунтирди. «Худди ўшандай. Бу стандарт тартиб-қоида», — деб қайд этди Каннаваро.
У содир бўлган воқеада «ҳеч қандай скандал йўқ»лигини алоҳида таъкидлади. «Ҳеч қандай нолойиқ ёки ҳурматсиз муносабат бўлмаган», — деди мураббий.
Унинг сўзларига кўра, худди шундай тартиб-қоидалар ўйинлар олдидан ҳам амал қилади. Нидерландияга қарши ўртоқлик учрашуви олдидан ҳам жамоалар хавфсизлик текширувидан ўтган.
«Ҳар бир ўйин олдидан жамоалар ёхуд Нидерландия билан бўлгани каби тўғридан тўғри меҳмонхонадан чиқишдан олдин ёки биз билан содир бўлганидек тўғридан тўғри стадионда текширувдан ўтказилади», — деб ёзди Каннаваро.
Ўзбекистон терма жамоаси бош мураббийи сафар ва ўйин ташкилотчилиги «мукаммал» бўлганини қўшимча қилди.
Gazeta ёзганидек, 8 июнь кунги ўйин олдидан хавфсизлик хизмати вакиллари Ўзбекистон терма жамоаси аъзоларини қўл металлодетекторлари ёрдамида текширувдан ўтказган. Шунингдек, улардан сумка ва анжомларини автобус ёнидаги ерга қўйиш сўралган. Яқин атрофда хавфсизлик соҳаси вакиллари ва ўз ити билан кинолог ҳам бор эди.
Ўзбекистон футбол ассоциацияси Gazeta`га текширув хавфсизлик масалалари билан боғлиқ бўлганини, бошқа жамоалар ҳам ундан ўтганини маълум қилди, бироқ делегация бу қадар қаттиқ тартиб-қоидани кутмаганини тан олди. Бошқа мамлакатлар жамоалари, хусусан, Сенегал ва Бельгия ҳам шунга ўхшаш текширувга дуч келган, аммо у аэропортда ўтказилган.
Ўзбекистон ТИВ матбуот котиби Омонулла Файзиев Gazeta`га берган изоҳида ушбу текширув бўйича АҚШ расмийларидан тушунтириш сўралганини қайд этди ва бу каби тартиб-қоидалар спорт тадбирлари руҳига путур етказмаслиги кераклигини таъкидлади.