АҚШлик дунёга машҳур хонанда, пианиночи ва композитор Жон Леженд (John Legend) Марказий Осиёга илк бор концерт дастури билан ташриф буюрди. 13 та «Грэмми», шунингдек, «Оскар», «Тони» ва «Эмми» мукофотлари соҳиби Ўзбекистон Маданият ва санъатни ривожлантириш жамғармаси таклифига биноан Самарқанддаги тарихий Регистон майдонида чиқиш қилди.
Одамлар концерт бошланишидан анча вақт олдин кириш жойида тўпланди. Айримлар чипталар билан асосий майдонга ўтган бўлса, бошқалар ансамбль атрофидаги зинапоялар, кузатув нуқталари ва бўш жойлардан ўрин эгаллади. Чироқлар ёғдуси мадраса пештоқларини неон кўк, яшил ва тўқ қизил рангларга бўяган эди. Майдон марказида қора рояль ўрнатилган саҳна жойлашган бўлиб, унинг ортида минглаб светодиодли шамлардан иборат майдон ястаниб турарди.
Фото: Маданият ва санъатни ривожлантириш жамғармаси
Жон Леженднинг саҳнага чиқишини томошабинлар давомли қарсаклар билан кутиб олди. Санъаткор қисқа таъзим билан жавоб қайтарди ва оқшомни ўзининг илк ижодига мансуб Save Room қўшиғи билан бошлади. Бундан сўнг у Green Light ва Tonight тароналарини ижро этди, улар янада жўшқин ва кейинги йилларда яратилган. Борганлар сезиларли даражада жонланди: кимдир таниш мисраларни бирга куйлар, кимдир рақсга тушарди. Деярли ҳамма бўлаётган воқеаларни телефонларига тасвирга олаётганди.
Бироқ концерт шунчаки хитлар тўпламидан иборат бўлмади. Оддий шоу ўрнига Леженд Ўзбекистонга An Evening of Songs and Storie» («Қўшиқлар ва ҳикоялар оқшоми») форматини олиб келди, бу эса унга томошабинлар учун куйлаш билан бир қаторда ўз ҳаёт йўлини сўзлаб бериш имконини ҳам берди.
«Мен сизга қаердан эканим, мусиқа ҳаётимга қандай кириб келгани, менга таъсир кўрсатган инсонлар, йўқотишлар, севги, ишонч ва мени бу ерга етаклаб келган йўл ҳақида гапириб бермоқчиман. Умид қиламанки, оқшом якунига қадар мени бироз яқинроқ таниб оласиз», — дея у томошабинларга юзланди.
Фото: Маданият ва санъатни ривожлантириш жамғармаси
Катта экранларда оилавий архивдан олинган фотосуратлар пайдо бўлди. Оқшомнинг илк «боби» томошабинларни созанда улғайган Огайо штатидаги Спрингфилд шаҳрига олиб борди. Леженд мусиқа кундалик ҳаётнинг бир қисми бўлган диндор оиласини ёдга олди: бобоси пастор бўлиб хизмат қилган, бувиси органда, отаси барабанда ўйнаган, онаси эса черков хорига раҳбарлик қилган.
Санъаткорнинг сўзларига кўра, айнан черков унга илк бор тингловчилар билан боғлиқликни ҳис қилишни ўргатган. Ўша ерда у ҳали болалик чоғидаёқ мусиқа «бирлаштиришга, таскин беришга ва умид бағишлашга қодир» эканини англаб етган. Жон Леженд ўзига пианино чалишни ўргатган марҳума бувисининг хотирасига бағишлаб Lay Me Down қўшиғини ижро этди.
Фото: Маданият ва санъатни ривожлантириш жамғармаси
Юлдузнинг ёшлиги ҳақидаги ҳикоя ёш Жон уларнинг ижоди билан улғайган созандалар атрофида қурилди. Улар орасида америкалик соул-хонанда Стиви Уандер алоҳида ўрин эгаллаган бўлиб, унинг машҳур Ribbon in the Sky ва I Believe (When I Fall in Love It Will Be Forever) композициялари Регистондаги ёзги оқшомда янгради.
Лирик йўналишдаги Stay With You қўшиғи концертнинг John R. Stephens деб номланган бобини очиб берди — бу созанданинг асл исм-шарифидир. Бу қисмда санъаткор машҳурликка эришгунга қадар ва жарангдор John Legend тахаллуси пайдо бўлгунича ўтган даврларни ёдга олди. Айниқса, God Only Knows жуда таъсирли янгради — Легенд уни мусиқа жўрлигисиз куйлади.
«Мен узоқ вақт давомида икки хил ҳаёт кечирдим. Кундузи офисда ишлардим, кечқурунлари эса қўшиқ ёзиб, саҳнага чиқардим. Қайсидир паллада тушуниб етдимки: агар ўз тақдирим ва вазифамга чиндан ишонсам, ўз хавфсизлигимни ўйлашни тўхтатиб, ўзимни бутунлай мусиқага бағишлашим керак экан», — дея ўз фикрлари билан ўртоқлашди хонанда.
Фото: Маданият ва санъатни ривожлантириш жамғармаси
Рад этишлар билан ўтган йиллар ва фаолиятидаги илк муваффақиятларни ёдга олар экан, Леженд томошабинларга хип-хоп ва соул йўналишининг энг нуфузли намояндаларидан бири ҳисобланган хонанда Лорин Ҳилл ҳамда продюсер Канье Уэст билан танишиш тарихини сўзлаб берди. Мусиқий жиҳатдан бу босқич Never Let Me Down, Slum Village, American Boy трекларидан парчалар билан намойиш этилди, Used to Love U қўшиғини эса хонанда тўлиқ ва кўп минг кишилик бэк-вокалда ижро этди.
Муваффақият тарихи аста-секин машҳурлик ўзи нима учун керак, деган мавзудаги суҳбатга жой бўшатиб берди. Леженд ўсмирлик чоғидаёқ келажак ҳақидаги иншолар танловида қатнашгани ва унда машҳур созанда бўлишни ҳамда ўз овозидан адолат ва тенглик йўлидаги курашда фойдаланишни хоҳлаши ҳақида ёзганини сўзлаб берди.
«Ўшандан бери ушбу ваъдамга мувофиқ яшашга ҳаракат қиламан», — деди созанда рэпер Common билан биргаликда «Сельма» (2014) тарихий драмаси учун ёзган Glory қўшиғини ижро этишдан олдин. Фуқаролик ҳуқуқлари учун курашнинг замонавий мадҳиясига айланган ушбу тарона Лежендга «Оскар» ва 10-«Грэмми» мукофотини тақдим этган.
Фото: Маданият ва санъатни ривожлантириш жамғармаси
Оқшомнинг якуний қисмини Жон Леженд севги мавзусига бағишлади. Созанда рафиқаси Крисси Тейген билан қандай танишгани ва 2013 йилда дунёдаги энг асосий тўй хитларидан бирига айланиши пешанасига ёзилган All of Me қўшиғи қандай яратилгани ҳақида сўзлаб берди. Илк ноталардан бошлабоқ томошабинлар унга жўр бўлишни бошлади. Кўпчилик телефонларининг чироқларини ёқиб, яқинларини бағрига босди — бундан 13 йил олдин бир инсон учун ёзилган қўшиқ бу оқшомда минглаб инсонлар учун севги тарихидек янграб турарди.