«Uzbekistan Airways» акциядорлик жамиятини трансформация қилиш ва халқаро IPO’га тайёрлаш ишларини жадаллаштириш масаласи Президент Шавкат Мирзиёевга тақдим этилди. Бу ҳақда Президент матбуот хизмати хабар берди.
Қайд этилишича, бу жараёнда Миллий инвестиция жамғармаси ташкил этилгани ва унинг бошқарувига «Franklin Templeton» компанияси жалб қилингани муҳим қадам сифатида қайд этилди. Ўтган ойда жамғарма илк бор халқаро бозорда 690 миллион долларлик активларни жойлаштирди. Бу жараёнда инвесторлардан қарийб 3 миллиард долларлик буюртмалар келиб тушгани Ўзбекистон активларига қизиқиш юқори эканини кўрсатди.
Энди жамғарма портфелидаги 13 та йирик корхонани IPO’га тайёрлаш вазифаси турибди. Улар қаторида «Uzbekistan Airways», «Ўзсаноатқурилишбанк», «Ўзбекгидроэнерго», «Ўзбекистон миллий электр тармоқлари» ва «Ўзбектелеком» ҳам бор.
«Franklin Templeton» мутахассислари миллий авиакомпания фаолиятини таҳлил қилиб, 115 та чора-тадбирдан иборат трансформация дастурини ишлаб чиққан. Ҳисоб-китобларга кўра, мазкур дастур тўлиқ амалга оширилса, компаниянинг операцион даромадлари бир йилда 120 миллион долларга ошиши мумкин.
Дастурда маршрутларни оптималлаштириш, тўғридан тўғри сотувларни кенгайтириш, мижозлар билан ишлаш тизимини яхшилаш, парвозлар самарадорлигини ошириш ва хизмат кўрсатувчи тармоқ корхоналар фаолиятини ривожлантириш каби йўналишлар назарда тутилган.
Шунингдек, авиакомпаниянинг бозор қийматини ҳозирги 1,6 миллиард доллардан 2,3 миллиард долларгача ошириш имконияти мавжудлиги қайд этилди. Бироқ тақдимотда дастур ижроси ҳозирча кутилган суръатда кечмаётгани ҳам танқид қилинди.
Президент компанияни халқаро капитал бозорига олиб чиқиш учун бошқарув сифатини ошириш, молиявий интизомни кучайтириш, халқаро стандартлар асосида ҳисобот юритиш ва кредит рейтингини яхшилаш зарурлигини таъкидлади.
Йил якунига қадар «Uzbekistan Airways» акцияларининг 15–20 фоизини халқаро IPO орқали сотиш режалаштирилган. Бунинг учун компаниянинг инвестицион жозибадорлигини ошириш, активларни қайта кўриб чиқиш ва давлат буюртмалари бўйича харажатларни қоплаш механизмларини жорий этиш белгиланди.
Шу билан бирга, мамлакатга келаётган туристлар сони тез суръатларда ортиб бораётгани қайд этилди. Йил бошидан буён Ўзбекистонга ташриф буюрган сайёҳлар сони 27,5 фоизга ўсиб, қарийб 5,5 миллион нафарга етган. Шу муносабат билан самолётлар паркини кенгайтириш ва Тошкентни Марказий Осиёнинг йирик авиаҳабига айлантириш бўйича қўшимча вазифалар белгиланди.