Шанба куни Тошкентнинг Бектемир туманида пойтахтдаги йирик шаҳарсозлик лойиҳаларидан бири — Daryo bo‘yi business city концепцияси тақдимоти бўлиб ўтди. Бу ҳақда шаҳар ҳокимлиги матбуот хизмати маълум қилди.
Лойиҳа Чирчиқ дарёсининг 24 километрлик қисми бўйлаб ҳудудни комплекс ривожлантиришни кўзда тутади. Қирғоқбўйи ҳудудини икки томонлама ободонлаштириш, турар жой ва ишбилармонлик мавзелари қуриш, жамоат жойлари, транспорт ва муҳандислик инфратузилмасини ривожлантириш режалаштирилган.
Лойиҳани амалга ошириш режалари президент Шавкат Мирзиёевнинг 2020 йил 29 май куни Сергели ва Зангиота туманларига ташрифидан сўнг маъқулланган эди. Ўшанда дарёнинг Бектемир ва Сергели туманларидан ўтувчи 16 км узунликдаги қисмини 65−80 метргача торайтириш таклиф этилаётгани хабар қилинганди. Ҳосил бўлган ҳудудда (400 гектар экани айтилган) ушбу лойиҳани амалга ошириш кўзда тутилган. Ўша йилнинг ўзида лойиҳани амалга ошириш бўйича дирекция ташкил этилди.
2021 йилнинг май ойида лойиҳа президентга тақдим этилган ва уни амалга оширишга икки йил вақт кетиши маълум қилинган. Ҳозирги вақтда лойиҳанинг биринчи босқичи якунланган — дарё қирғоқларининг бир қисми торайтирилган. Янги концепция лойиҳа узунлигини Яшнобод туманини ҳам қамраб олган ҳолда 24 км гача узайтиришни назарда тутади.
«Лойиҳа пойтахт тараққиёти одамларга хизмат қилишига: яшаш, дам олиш, ишлаш, сайр қилиш ва оилавий ҳордиқ чиқариш учун қулай масканлар барпо этиш, янги иш ўринлари яратиш, хизмат кўрсатиш соҳаси, туризм, савдо ва тадбиркорликни ривожлантиришга қаратилган», — дейилади баёнотда.
«Daryo bo‘yi business city қирғоқбўйи ҳудудларининг салоҳиятини янгича очиб бериш, шаҳар муҳитини кенгайтириш, янги турар жой ва ишбилармонлик ҳудудларини мавжуд инфратузилма билан боғлаш ҳамда пойтахт аҳолиси ва меҳмонлари учун қўшимча жозибадор масканлар яратиш имконини беради», — дея қайд этди ҳокимлик.
Тадбирда Президент администрацияси раҳбарининг сув таъминоти тизимини ислоҳ қилиш масалалари бўйича ўринбосари Тимур Бутунбаев, Тошкент шаҳри ҳокими Шавкат Умурзоқов, туманлар ҳокимлари, пойтахтдаги тегишли идора ва ташкилотлар раҳбарлари, шунингдек, лойиҳалаш ва пудрат ташкилотлари вакиллари иштирок этди.
Лойиҳавий ечимлар ўрганиб чиқилгандан сўнг, аҳоли қулайлиги, хавфсизлик, экологик барқарорлик ва лойиҳанинг иқтисодий самарадорлигини ҳисобга олган ҳолда концепцияни такомиллаштириш бўйича тавсиялар берилди, дея билдирди ҳокимлик.
«Ҳозирда [Чирчиқ дарёсида] сув сатҳи аввалги кўрсаткичлардан паст. Дарё қирғоқлари жуда узун, аммо, афсуски, инсон аралашуви туфайли ҳозир улар ачинарли аҳволда. Атрофдаги ҳудуд карьерга айланиб қолгани, бу ерда техникалар кўплиги кўриниб турибди. Бу экологияга жуда катта зарар, чунки бу ердан табиий бойликлар — ер, шағал олиб чиқиб кетилмоқда», дея қайд этганди 2020 йилда Business city дирекцияси.
Қонунчиликка мувофиқ, дарё ўзанларини ўзгартириш, улардан фойдали қазилмаларни қазиб олиш ва сув объектларининг ҳолатига таъсир этувчи бошқа ишларни олиб боришга фақат экология ва атроф-муҳитни муҳофаза қилиш, сув хўжалиги, геология ва минерал ресурслар органларининг рухсатномаси олингандан кейингина йўл қўйилади.
Ҳокимлик томонидан тақдим этилган слайдларда лойиҳа қуйидаги қисмларга бўлиниши мумкинлиги кўринган: River City, Lake City, Villa City ва Tech City. Унинг умумий қиймати 1,4 триллион сўмдан ортиқ деб баҳоланган эди, бироқ узунликнинг ортиши муносабати билан бу рақам янада ўсиши мумкин.
Қуйида ҳокимлик видеоролигидан олинган тақдимот слайдлари келтирилган:
Тошкентда 12 та сунъий кўл ташкил этиш лойиҳаси алоҳида муҳокама қилинган.