«Ацтека», Мехико
18 июнь, Тошкент вақти билан 7:00. Ўзбекистон — Колумбия
Фото: ФИФА.
«Ацтека» — жаҳон чемпионатининг иккита финалига — 1970 ва 1986 йилларда — мезбонлик қилган тарихдаги ягона стадион, энди эса учинчи мундиалга ҳозирлик кўрмоқда. Майдон кўча сатҳидан 9 метр қуйида жойлашган. Арена шундай лойиҳалаштирилганки, қуёш майдонни перпендикуляр кесиб ўтади ва ҳеч бир жамоага устунлик бермайди.
Фото: ФИФА.
Айнан шу ерда 1970 йилда Пеле ўзининг учинчи жаҳон чемпионлигини қўлга киритган. Айнан шу ерда, орадан 16 йил ўтиб — 1986 йилги футбол бўйича жаҳон чемпионати чорак финалида — Диего Марадона Англия дарвозасига битта ўйиннинг ўзида ҳам «Худонинг қўли», ҳам «аср голи»ни киритган.
Фото: ФИФА.
Бироқ «Ацтека» фақат футбол воқеалари билан танилмаган. 1993 йилда бу ерда Рим папаси Иоанн Павел II иштирокида 100 мингдан ортиқ киши тўпланган месса (ибодат маросими) бўлиб ўтган. 1969 йилда эса стадионда бир вақтнинг ўзида бутун Мексика бўйлаб рангли телевидение орқали трансляция қилинган тарихдаги илк ўйин ўтказилган.
Фото: ФИФА.
Ҳозирда арена 87 523 томошабинни сиғдира олади. Бу — Лотин Америкасидаги энг йирик ва дунёдаги сиғими энг катта футбол стадионларидан биридир. 1986 йил 17 августда «Ацтека» ноёб воқеага гувоҳ бўлган: «Америка» — «Гвадалахара» учрашуви вақтида оммавий муштлашувдан сўнг ҳакам Антонио Маркес майдондаги барча 22 футболчини ўйиндан четлатган.
NRG Stadium, Хьюстон
23 июнь, Тошкент вақти билан 22:00. Португалия — Ўзбекистон
Фото: ФИФА.
Стадион 2002 йилда очилган ва 72 220 томошабинга мўлжалланган. NRG Stadium Миллий футбол лигаси (NFL) стадионлари орасида тўлиқ суриладиган томга эга илк стадион бўлди. Қирқ даража жазирамадан шунчаки беркиниб олишнинг имкони бор экан, унга чидаб ўтиришга на ҳожат?
Фото: ФИФА.
Арена анча вақтдан буён фақат футбол билангина яшамайди. Ҳар йили бу ерда Houston Livestock Show and Rodeo — дунёдаги энг йирик родео ўтказилади ва унга 2 миллиондан ортиқ киши ташриф буюради. Бир неча ҳафта давомида футбол майдони ўз ўрнини буқалар, ковбойлар ва қишлоқ хўжалиги кўргазмаларига бўшатиб беради.
2017 йилда айнан шу ерда Америка футболи тарихидаги энг сермаҳсул финаллардан бири — «Нью Ингленд Пэтриотс» ва «Атланта Фэлконс» ўртасидаги Супербоул бўлиб ўтган ва ўйин биринчиларнинг қўшимча вақтдаги ғалабаси билан якунланган.
Фото: ФИФА.
Жаҳон чемпионати олдидан арена 55 млн долларга модернизация қилинди: томи янгиланди, улкан экранлар алмаштирилди, лифт ва эскалаторлар тизими реконструкция қилинди. Мундиал давомида стадион расман Houston Stadium деб номланади — ФИФА қоидалари ареналар номида тижорий брендлардан фойдаланишни тақиқлайди.
Фото: ФИФА.
Қизиғи шундаки, сурилма томнинг майдони 7 гектардан ошади ва уни очиш ёки ёпиш учун тахминан 10 дақиқа вақт кетади. Мухлислар буни деярли пайқамаслиги мумкин, муҳандислар учун эса касбий ифтихор манбаи. Арена жаҳон чемпионатининг еттита ўйинига, жумладан, плей-офф босқичи учрашувларига ҳам мезбонлик қилади.
Mercedes-Benz Stadium, Атланта
28 июнь, Тошкент вақти билан 04:30. Конго ДР — Ўзбекистон
Фото: ФИФА.
Mercedes-Benz Stadium 2017 йилда қурилган. Лойиҳа қиймати қарийб 1,6 млрд долларни ташкил этган. Арена саккизта учбурчак «гулбарг»дан иборат кинетик сурилма томга эга, улар марказда фотоаппарат диафрагмаси сингари бирлашади. Меъморлар бу дизайнни яратишда Рим Пантеонидан илҳомланишган.
Фото: ФИФА.
Бироқ стадионнинг асосий мўъжизаси унинг ичкарисида жойлашган. Том остига узунлиги 330 метрдан ошадиган айланма Halo Board ўрнатилган — бу спорт оламидаги энг катта 360 градусли экрандир. Томошабин ўйиндан чалғиган тақдирда ҳам, бу ерда доим томоша қилишга арзирли нимадир бор. Ҳатто ҳожатхонадаги кўзгуларга ҳам кичик дисплейлар ўрнатилган.
Фото: ФИФА.
Mercedes-Benz Stadium — жаҳон чемпионати стадионлари орасида ФИФА деярли истисно қилишга мажбур бўлган ягона аренадир. Томдаги улкан логотип конструкцияга шунчалик бириктирилганки, уни демонтаж қилиш ёки ниқоблаш бино қисмларига зарар етказиши мумкин эди.
Фото: ФИФА.
Стадионнинг яна бир ўзига хос жиҳати бор. Мулкдорлар озиқ-овқат ва ичимликлар нархини атайлаб АҚШдаги аксарият ареналарга қараганда анча паст даражада ушлаб туришади. Бу ерда хот-дог атиги 2 доллар туради. Ўзбекистонлик мухлисларда бунинг ҳақиқатан ҳам шундайлигини текшириб кўриш учун ажойиб имконият бор. 2026 йилги жаҳон чемпионати давомида стадион саккизта ўйинга, шу жумладан, ярим финалга мезбонлик қилиши кутилмоқда.
Фото: ФИФА.