АҚШ президенти Дональд Трамп Эрон билан урушни тўхтатиш бўйича дастлабки келишув аллақачон имзоланганини маълум қилди, бироқ унинг тўлиқ мазмуни ҳозирча эълон қилинмаган. Бу ҳақда Reuters ва BBC News хабар берди.
«Бу имзоланганини айтишдан жуда мамнунман, битим тўлиқ имзоланди», — деди Трамп G7 саммити доирасида Франция президенти Эммануэль Макрон билан музокаралар чоғида. Унинг қўшимча қилишича, АҚШ вице-президенти Жей Ди Вэнс 19 июнь куни Женевада бўлиб ўтадиган расмий имзолаш маросимида иштирок этади.
Оқ уй раҳбари меморандум матнини «бир неча кун ичида» эълон қилишга ваъда берди. «Унда нима дейилган? Эрон ҳеч қачон ядровий қуролга эга бўлмайди», — деди Трамп.
Reuters маълумотига кўра, келишув апрель ойида эълон қилинган сулҳни яна 60 кунга узайтиришни, шунингдек, Эрон февраль ойида АҚШ ва Исроил ҳужумидан кейин ёпиб қўйган Ҳурмуз бўғозини очишни ҳам назарда тутади. Ушбу икки ой давомида томонлар якуний шартнома тафсилотларини келишиб олади.
АҚШ президентининг баёноти ортидан нефть нархи 10 мартдан буёнги энг паст даражага тушди.
Америка амалдорлари келишув Трамп, Вэнс ва Эрон парламенти раиси Муҳаммад Багер Галебоф томонидан электрон шаклда имзоланганини маълум қилди.
Эрон президенти Масуд Пезешкиён ижтимоий тармоқларда АҚШ ва Эрон ўртасидаги англашув меморандуми жанговар ҳаракатларни тўхтатиш йўлидаги «муҳим қадам» эканини ёзди. Бироқ у мустаҳкам сулҳ бўйича якуний келишув «ҳали шаклланмаганини» таъкидлади.
Жей Ди Вэнс душанба куни CNN телеканалига берган интервьюсида имзоланган меморандум «тахминан бир ярим саҳифа»дан иборат бўлиб, «жуда умумий ҳужжат» эканини айтди.
Вэнснинг сўзларига кўра, ҳужжатнинг биринчи бандида Эрон ва АҚШ «минтақавий тинчлик ва барқарорлик»ка интилиш мажбуриятини олади. Меморандумнинг бир қисми сифатида Эрон террористик ташкилотларни молиялаштиришни тўхтатиш мажбуриятини ҳам зиммасига олган.
«Энг муҳими — улар ядровий қурол яратмаслик бўйича текшириш мумкин бўлган мажбуриятни қабул қилади», — деди Вэнс.
14 июнь куни АҚШ ва Эрон жанговар ҳаракатларни тўхтатиш бўйича келишувга эришганини эълон қилган эди. Мамлакатлар ўртасидаги асосий воситачи сифатида Покистон, шунингдек Қатар иштирок этган.