Футбол бўйича Ўзбекистон миллий терма жамоаси бош мураббийи Фабио Каннаваро жаҳон чемпионатининг биринчи турида Колумбиядан учралган мағлубият юзасидан фикр билдирди, деб хабар бермоқда Gazeta мухбири.
Ушбу учрашув миллий терма жамоа учун жаҳон чемпионати тарихидаги дебют ўйин бўлди.
Каннаваронинг сўзларига кўра, ўйин қизиқарли кечган, иккинчи бўлимда эса Ўзбекистон терма жамоаси ўйин боришини ўзгартира олган.
«Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Ўйин назоратини ўз қўлимизга олишга ҳаракат қилдик», — деди бош мураббий.
У Колумбия даражасидаги рақибга қарши, айниқса тўпсиз ўйнаш осон бўлмаганини таъкидлади.
«Авваламбор, биз Ўзбекистонни бутун дунёга ижобий намойиш этиш учун бу ерга келдик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари жамоаларга қарши ўйнаш, тўпсиз ҳаракат қилиш осонмас. Умуман олганда, иккинчи бўлимда яхши ҳаракат қилдик, бироқ, афсуски, гол ўтказиб юбордик», — дея қайд этди Каннаваро.
Бош мураббий бу учрашув ўзбек футболи тарихида қолишини алоҳида таъкидлади.
«Биз бу стадионда ўтган ушбу ўйинни эслаб қоламиз. Чунки бу тарихий ўйин. Биз Жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз», — деди у.
Шунингдек, Каннаваро шогирдлари билан фахрланишини билдирди. «Футболчиларимдан ғурурланаман. Улар яхши ўйнашди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин», — дея қайд этди мураббий.
Gazeta’нинг жамоа ўйиндан қандай сабоқлар олгани ҳақидаги саволига жавоб берар экан, Каннаваро бу ўйин шогирдлари учун яхши тажриба бўлганини айтди.
«Албатта, хатога йўл қўйсангиз ва бунинг учун биз бугун тўлагандек бадал тўласангиз, буни келажакдаги ўйинлар учун ёдда сақлаш керак. Биз тўпни аутдан ўйинга киритишда хато қилдик. Мен ўйинчилардан доим [аутдан] марказга ташламасликни сўрайман, лекин биз марказга оширдик ва иккинчи гол айнан шундай вазиятдан сўнг киритилди», — дея таъкидлади бош мураббий.
Ўйиндан сўнг Ўзбекистон терма жамоаси бош мураббийи Фабио Каннаваро Португалия билан бўлажак ўйин ҳақида гапириб, футболчиларни қўрқмасликка ва тўп билан дадилроқ ҳаракат қилишга чақирганини қайд этди.
«Агар ўйнашга журъат топа олмасак, ўйин учун етарлича бўшлиқлар очмасак, бизга қийин бўлади. Иккинчи бўлим анча яхши ўтди ва Португалияга қарши кўпроқ ирода ва жасорат кўрсатамиз, деб умид қиламан. Акс ҳолда, 90 дақиқани ўз майдон ярмингизда ўтказиш жуда қийин», — деди италиялик мутахассис.
Эслатиб ўтамиз, Ўзбекистон терма жамоаси Колумбияга 1:3 ҳисобида имкониятни бой берди. Учрашув Мехикодаги «Ацтека» стадионида бўлиб ўтди. Рақиб 40-дақиқада Даниэл Муноснинг голидан сўнг ҳисобни очди, аммо иккинчи бўлимда Аббосбек Файзуллаев ҳисобни тенглаштириб, Ўзбекистоннинг жаҳон чемпионатларидаги биринчи голига муаллифлик қилди. Шундан сўнг колумбияликлар Луис Диаснинг голи эвазига яна олдинга чиқиб олишди, ўйин сўнгида эса Хаминтон Кампас якуний ҳисобни ўрнатди.
Биринчи турдан кейин Колумбия 3 очко билан гуруҳда пешқадамлик қилмоқда. 1:1 ҳисобида дуранг қайд этган Португалия ва Конго ДР ҳисобида биттадан очко бор, Ўзбекистон эса ҳозирча очкосиз қолмоқда. Фабио Каннаваро жамоаси навбатдаги ўйинни 23 июнь куни соат 22:00 да Португалияга қарши ўтказади, сўнгра Конго ДР билан баҳс олиб боради.