Ўзбекистонлик гроссмейстер Нодирбек Абдусатторов Хорватия пойтахти Загреб шаҳрида бўлиб ўтган нуфузли «Grand Chess Tour 2026» мусобақасининг учинчи босқичи – «Super Rapid and Blitz Croatia» турнирида кумуш медални қўлга киритди.
1–5 июл кунлари ўтказилган мусобақада дунёнинг энг кучли 10 нафар гроссмейстери иштирок этди. Ўзбекистон шарафини ҳимоя қилган Нодирбек Абдусатторов рапид ва блиц баҳслари якунларига кўра 23,5 очко тўплаб, Франция вакили Алиреза Фирузжа билан бир хил натижа қайд этди.
Ғолибни аниқлаш учун тай-брейк ўйинлари ташкил этилди. Икки партия 1:1 ҳисобида якунлангач, армегеддон баҳсида Алиреза Фирузжа ғалаба қозониб, чемпионликни қўлга киритди.
Якуний натижаларга кўра:
- Алиреза Фирузжа (Франция)
- Нодирбек Абдусатторов (Ўзбекистон)
- Максим Вашье-Лаграв (Франция)
Турнирни иккинчи ўринда якунлаган ҳамюртимиз 42,5 минг АҚШ доллари миқдоридаги мукофотга сазовор бўлди.