Тошкент шаҳрининг Шота Руставели кўчасида қурилиш ишлари давомида шикаст етказилган қувурдан чиққан оқова сув Салар каналига оқизилгани аниқланди. Бу ҳақда Тошкент шаҳар Экология ва иқлим ўзгариши бош бошқармаси хабар берди.
Маълум қилинишича, ҳолат юзасидан бош бошқарма бошлиғи А. Расулов, лаборатория мутахассислари ҳамда Яккасарой тумани экология назорати инспекцияси давлат инспекторлари иштирокида тезкор ишчи гуруҳ тузилиб, воқеа жойига чиқиб ўрганилганда оқова сув Салар каналига тўғридан тўғри ташлаш ҳолати тасдиқланган.
Ҳолат юзасидан бошқарма таҳлилий лабораторияси мутахассислари томонидан канал сувидан белгиланган тартибда намуналар олиниб, лаборатория таҳлилига юборилган.
Бошқарманинг кейинроқ хабар беришича, Яккасарой тумани экология назорати инспекцияси давлат инспекторлари томонидан қурилиш объектидан ҳосил бўлаётган оқова сувларнинг Салар каналига оқизилишининг олди олиниб, оқова сувлар белгиланган тартибда марказий канализация тармоғига йўналтирилган.
«Шу орқали сув объектининг ифлосланишининг олди олинди ҳамда экологик хавфсизликни таъминлаш юзасидан зарур чоралар кўрилди», — дейидажи хабарда.
Эслатиб ўтамиз, Тошкентнинг Яккасарой туманида диаметри 1800 мм бўлган темир-бетон канализация тармоғи шикастланди ва тупроқ ўпирилиши юз берганди.
Ҳодиса 3 июль куни соат 15:15 атрофида Салар кўчаси бўйлаб жойлашган Solaris турар жой мажмуаси яқинида содир бўлган. Аварияга шу атрофда қурилиш олиб бораётган Better best МЧЖ томонидан техник меъёрлар ва хавфсизлик талаблари бузилгани сабаб бўлган.
Маълум қилинишича, масъул ташкилотлар аввалроқ ушбу қурилиш компаниясини муҳандислик тармоқларини ҳимоя қилиш зарурлиги ҳақида бир неча бор огоҳлантирган. Шунга қарамай, зарур хавфсизлик чоралари ўз вақтида кўрилмаган.
Ҳолат юзасидан дастлабки ҳужжатлар тўпланиб, ҳуқуқий баҳо бериш ва айбдорларга нисбатан қонуний чора кўриш учун ҳуқуқни муҳофаза қилувчи органларга тақдим этилган.