АҚШ президенти Дональд Трампнинг қўнғироғидан сўнг Халқаро футбол федерацияси (ФИФА) АҚШ терма жамоасининг 25 ёшли ҳужумчиси Фоларин Балогунга кўрсатилган қизил карточка туфайли юзага келган дисквалификацияни бекор қилди, деб хабар бермоқда Reuters.
Балогун ЖЧ 1/16 финали доирасида Босния ва Герцеговина терма жамоасига қарши кечган учрашувда ҳимоячига нисбатан қўполлик ишлатгани учун қизил карточка олиб, майдондан четлатилганди.
2:0 ҳисобидаги ғалабадан сўнг АҚШ 1/8 финалга йўл олган ва у ерда Бельгия билан тўқнаш келади. Қоидага кўра, Балогун бу ўйинда қатнаша олмасди — майдондан четлатиш автоматик тарзда навбатдаги учрашув учун дисквалификацияга сабаб бўлади.
Бироқ ўйиндан сўнг Дональд Трамп ФИФА президенти Жанни Инфантинога қўнғироқ қилиб, Балогунга кўрсатилган қизил карточка қарорини қайта кўриб чиқишни сўраган.
ФИФАнинг Тартиб-интизом қўмитаси футболчининг дисквалификациясини тўхтатиб, унга бир йиллик синов муддати тайинлади.
The Atlethic нашрининг аниқлик киритишича, ФИФА тартиб-интизом кодексининг 27-моддасига мувофиқ, агар Фоларин Балогун ушбу синов муддати давомида худди шундай хусусдаги ва оғирликдаги бошқа бир қоидабузарликни содир этса, дисквалификацияни тўхтатиб туриш қарори бекор қилинади ва янги қоидабузарлик учун тайинланадиган ҳар қандай қўшимча жазодан ташқари, ушбу жазо ҳам ижро этилади.
«Тўғри иш қилгани ва бундай яққол адолатсизликни тузатгани учун ФИФАга раҳмат!» — деб баёнот берди Трамп.
The New York Post нашрининг ёзишича, АҚШ президенти ва Инфантино ўртасида чиндан ҳам мулоқот бўлиб ўтган. Қайд этилишича, Трамп нима сабабдан қизил карточка кўрсатилгани ва бунинг ортидан нега дисквалификация қарори берилганини яхшироқ тушунишни истаган.
Бельгия футбол федерацияси эса ФИФАнинг «Футбол бўйича 2026 йилги Жаҳон чемпионати регламентига тўғридан тўғри зид келувчи» бу қароридан «ҳайратда қолганини» маълум қилди.
Эслатиб ўтамиз, аввалроқ Криштиану Роналду ҳам шунга ўхшаш вазиятга тушиб, Жаҳон чемпионати бошидаги дисквалификациядан қутилиб қолганди. Ўшанда ФИФА Португалия терма жамоаси сардорига уч ўйинлик тақиқ қўйган, бироқ охирги икки ўйинга белгиланган жазо ижросини «бир йиллик синов муддати» билан тўхтатиб турганди.