Ўзбекистон президенти Шавкат Мирзиёев 7 июль куни автомобилда юк ташувчиларни қўллаб-қувватлаш тўғрисидаги қарорни имзолади. Бу ҳақда Транспорт вазирлиги Gazeta’га хабар берди.
2027 йил 31 декабргача мамлакатга айрим турдаги юк транспорти воситаларини божхона божи ва утилизация йиғимини тўламасдан олиб кириш мумкин бўлади.
Имтиёз ишлаб чиқарилганига беш йилдан ошмаган ҳамда «Евро-5» ва ундан юқори экологик тоифага мос келадиган юк ташишга мўлжалланган тягач (шатакчи)ларга (ТИФ ТН кодлари 8701 21, 8701 22, 8701 23, 8701 24) нисбатан қўлланилади. Газда ишлайдиган автомобиллар бундан мустасно.
Шунингдек, умумий вазни 15 тоннадан ортиқ ёки кузовининг ички ҳажми камида 76 куб метр бўлган ярим тиркамалар (ТИФ ТН коди 8716 39) ҳам бож ва утилизация йиғимидан озод қилинди.
Ҳужжатда қайд этилишича, ушбу чора юк автомобиллари паркини янгилаш, маҳаллий ташувчиларнинг рақобатбардошлигини ошириш, экспорт ва импортда транспорт харажатларини камайтириш ҳамда товарларни етказиб бериш муддатларини қисқартиришга хизмат қилиши лозим.
Агар имтиёз асосида олиб кирилган транспорт воситаси божхона расмийлаштирувидан сўнг уч йил ичида экспорт қилинса ёки унинг ТИФ ТН коди ўзгарадиган тарзда қайта жиҳозланса, имтиёз бекор қилинади. Бундай ҳолда бож ва утилизация йиғимини тўлашга тўғри келади. Ёқилғи турини ўзгартириш билан боғлиқ қайта жиҳозлаш ҳоллари бундан мустасно.
Қарор билан, шунингдек, Европа стандартларига мос келадиган мазкур юк автомобилларини импорт қилишда уларни мажбурий сертификатлаштиришдан вақтинча озод этиш тўғрисида тегишли қарор қабул қилиниши белгиланди.
Жаҳон савдо ташкилоти билан ишлаш бўйича идоралараро комиссияга, агар бундай юк автомобиллари Европа стандартларига мос келса, уларни 10 кун муддатда мажбурий сертификатлаштиришдан вақтинча озод қилиш тўғрисида қарор қабул қилиш топширилди.
Президент 1 июль куни бўлиб ўтган йиғилишда транспорт-логистика соҳасига хусусий сармояларни кенг жалб этиш учун логистика марказларига мўлжалланган замонавий ускуналар, омборхона ва юк ортиш-тушириш техникаси, агрегатлар ва эҳтиёт қисмларни олиб киришда божхона божларини камайтириш ҳамда мажбурий сертификатлаштириш талабларини соддалаштириш режалаштирилаётганини таъкидлаган эди.
Эслатиб ўтамиз, 2025 йил февраль ойида Президент раислигида ўтказилган йиғилишда «Евро-5» ва ундан юқори экологик стандартларга жавоб берадиган юк автомобиллари божхона божлари ва утилизация йиғимидан яна уч йилга озод қилиниши айтилган эди.