Ўзбекистонлик гроссмейстер Нодирбек Абдусатторов Загреб шаҳрида бўлиб ўтган Super Rapid & Blitz Croatia 2026 турнирида — Grand Chess Tour мусобақаларининг учинчи босқичида иккинчи ўринни эгаллади.
Grand Chess Tour битта мусобақа эмас, балки мавсумий элита шахмат турнирлари сериясидир. Польша, Руминия, Хорватия ва АҚШдаги босқичлар GCT-2026 тақвимига киритилган. Ҳар бир босқичнинг ўз ғолиби, турнир жадвали ва мукофот жамғармаси мавжуд. Шу билан бирга, натижалар сериянинг умумий ҳисобида ҳам инобатга олинади: шахматчилар иштироки учун Grand Chess Tour очколарини қўлга киритади. Беш босқич якунларига кўра, мавсумнинг энг яхши иштирокчилари тур финалига йўлланма олади.
Алиреза Фирузжа ва Нодирбек Абдусатторов. Фото: GCT
Якуний ўйин куни олдидан Алиреза Фирузжа блицнинг биринчи кунида 9 партиядан 8 очко тўплаб, энг яқин таъқибчиларидан уч очко олдинда эди. Бироқ иккинчи куни у етти партияда 2 очко жамғарди ва бу вазиятдан Абдусатторов унумли фойдаланди.
Ўзбекистонлик шахматчи кунни мағлубиятсиз ўтказиб, 9 партиядан 6,5 очко тўплади. У, жумладан, амалдаги жаҳон чемпиони Гукеш Доммаражу ва Иван Шарични мағлуб этди ҳамда мусобақа тугашига икки тур қолганда якка пешқадамга айланди.
Фирузжа кейинчалик бу кунни «ҳаётимдаги энг ёмон блиц куни» деб атади. У мусобақани сўнгги турдан битта олдингисида Гукешга қарши партияда сақлаб қолишга муваффақ бўлди: франциялик шахматчи ютқазаётган вазиятда бўлишига қарамай, рақибини чалғитиб, ғалаба қозонди. Шу туфайли у ва Абдусатторов сўнгги турдаги ўзаро партия олдидан тенг очко билан келди.
Фото: GCT
Асосий мусобақанинг ҳал қилувчи партиясида Фирузжа ва Абдусатторов дуранг ўйнади. Шундан сўнг шахматчилар 8 дақиқа + 3 сония назоратидаги икки тай-брейк партиясини ўтказди — улар ҳам дуранг билан якунланди.
Ғолиб армагеддонда аниқланди: Абдусатторов оқ донада ўйнади ва бир дақиқа кўпроқ вақтга эга эди, аммо турнирда ғолиб чиқиши учун унга фақат ғалаба керак бўларди. Мураккаб курашда ўзбекистонлик шахматчи устунликка эришиш имкониятига эга бўлди, бироқ ундан фойдалана олмади ва партия дуранг рухли эндшпилга ўтди. Дуранг қора доналарда ҳаракат қилган Фирузжага чемпионликни келтирди.
Турнир якунларига кўра, Фирузжа ва Абдусатторов 23,5 очкодан тўплади. Максим Вашье-Лаграв ҳамда Рамешбабу Праггнанандҳа 21,5 очкодан жамғариб, учинчи ўринни бўлишиб олди. Кейинги ўринларни Винсент Кеймер — 20, Гукеш Доммаражу — 18,5, Аниш Гири — 17, Богдан-Даниэл Дяк — 15, Йорден ван Форест — 12,5 ва Иван Шарич — 7 очко билан эгаллади.
Абдусатторов 42,5 минг доллар мукофот пулини қўлга киритди. Фирузжа 47,5 минг доллар ва Grand Chess Tour’нинг 11 очкосига эга бўлди. Хорватияда wildcard (махсус таклифнома) асосида иштирок этган ўзбекистонлик шахматчи эса ушбу натижа учун GCT очколарини олмади.
Шунингдек, у блиц рейтингидаги кўрсаткичини 2820 очкога етказиб, жаҳон рейтингида иккинчи ўринни мустаҳкамлади. Эслатиб ўтамиз, у Гонконгда бўлиб ўтган рапид ва блиц бўйича жамоавий жаҳон чемпионатидан сўнг блиц рейтингида 2800 очколик маррани забт этиб, назорат турларидан камида биттасида бу натижага эришган илк ўзбекистонлик шахматчига айланган эди.
Super Rapid & Blitz Croatia турнири 1−5 июль кунлари Загреб шаҳрида бўлиб ўтди. Дастлаб иштирокчилар 25 дақиқа + 10 сония назоратидаги рапид бўйича айланма тизимда, сўнг 5 дақиқа + 2 сония назоратидаги блиц бўйича икки даврали айланма тизимда баҳс олиб борди.