Қозоғистонда чегара орқали ёнилғини ноқонуний олиб чиқиб кетишга чек қўйиш бўйича чора-тадбирлар амал қилмоқда. Бу ҳақда ҳукуматдаги брифингда энергетика вазири ўринбосари Кайирхан Туткишбаев маълум қилди, дея хабар берди Tengrinews.

Вазир ўринбосарининг сўзларига кўра, амалдаги чоралардан бири чегарадош давлатлардан транспорт воситаларининг киришига чеклов ўрнатиш бўлди.

«Ҳозирда чегарадош давлатлардан юк ва енгил транспорт воситалари Қозоғистон ҳудудига суткасига бир мартадан кўп бўлмаган миқдорда кириши мумкин бўлган чора амал қилмоқда», — деди у.

«Асосий иш ҳозирда ёнилғининг „кулранг“ экспорти учун фойдаланиладиган қўшимча ёнилғи бакларига эга автомобилларни аниқлаш бўйича олиб борилмоқда», — деди вазир ўринбосари.

Унинг сўзларига кўра, чегараолди ҳудудларида ёнилғини ноқонуний олиб чиқиб кетишга уринаётган қоидабузарлар мунтазам равишда аниқланмоқда.

Бундан аввалроқ бош вазир Олжас Бектенов ёнилғи-мойлаш материалларининг ноқонуний олиб чиқиб кетилиши устидан назоратни кучайтиришни топширганди. Мамлакат ҳукумати маълумотларига кўра, атиги икки сутка ичида ўтказиш пунктларида қўшимча баклар ва канистраларда 3 тоннадан ортиқ ёнилғи олиб чиқиб кетилиши билан боғлиқ 61 та уринишнинг олди олинган, йил бошидан буён эса нефть маҳсулотларини ноқонуний олиб чиқиб кетишга қаратилган 593 та уриниш аниқланган.