2026−2027 ўқув йили учун давлат олий ва касбий таълим муассасаларига кириш тест синовлари 14 июлдан 23 июлга қадар бўлиб ўтади, дея хабар бермоқда Билим ва малакаларни баҳолаш агентлиги.
Имтиҳонлар 10 кун давом этади. Тест синовлари кунига икки сменада ташкил этилади:
- 1-смена — соат 08:00 да;
- 2-смена — соат 15:00 да бошланади.
Абитуриентлардан тест синовлари бошланишидан камида бир ярим соат олдин белгиланган ҳудудга етиб келиш талаб этилади.
Имтиҳонда иштирок этиш учун онлайн рўйхатдан ўтган абитуриентларга «Абитуриент рухсатномаси»ни бериш бошланган. Уни агентликнинг my.uzbmb.uz сайти орқали шахсий кабинетдан юклаб олиш ва чоп этиш лозим.
Абитуриентлар фақат рухсатномада кўрсатилган манзил, сана ва сменада тест топширади. Бошқа ҳудуд ёки вақтда имтиҳонга киришга рухсат берилмайди.
Тест синовларига келаётганда фуқаролик паспорти (ID карта) ва абитуриент рухсатномасининг аслини олиб келиш шарт. Паспорт нусхаси ёки бошқа ҳужжатлар билан келган, шунингдек, белгиланган вақтдан кечикиб келган абитуриентлар имтиҳонга киритилмайди.
БМБА маълумотларига кўра, жами 677 907 нафар абитуриент онлайн рўйхатдан ўтган бўлиб, 664 609 нафари тест синовларида иштирок этадиган абитуриентлардир. Уларнинг 365 196 нафарини (53,9 фоиз) аёллар, 312 711 нафарини (46,1 фоиз) эса эркаклар ташкил этди.
Бу йили 64 та ёпиқ турдаги катта сиғимли бино тест синовларига тайёрланди. Уларда бир сменада 1183 та гуруҳда 35 490 нафар, бир кунда эса 70 980 нафар абитуриент имтиҳонда иштирок этади.
