Украина президенти Владимир Зеленский яқин орада Юлия Свириденко бош вазир лавозимини тарк этишини эълон қилди. Бундай қарор «Украина ўз сиёсий стратегиясини ўзгартираётгани» билан боғлиқ, деб ёзди президент ўзининг Telegram каналида.
«Бундан буён ҳар бир устувор ташқи сиёсий йўналиш учун катта тажрибага эга аниқ бир шахс жавобгар бўлади. У раҳбарлар даражасида эришилган келишувларни ҳамда Украина халқи кутаётган натижаларни амалга оширишга қодир бўлиши лозим», — дея маълум қилди Зеленский.
Унинг сўзларига кўра, бундай йўналишлар қаторига АҚШ билан ҳамкорлик (жумладан, Patriot тизимларини ишлаб чиқариш учун лицензиялар бўйича келишувлар) ҳамда Европа Иттифоқи билан мудофаа соҳасидаги ва Украинанинг Иттифоққа аъзо бўлиши масалаларидаги ҳамкорлик киради.
Бундан ташқари, Украинанинг қўшни давлатлари билан муносабатларни янги асосга кўра қуриш кераклиги, айниқса, бу Польша ва Венгрияга тегишли экани айтилди.
Хавфсизлик ва иқтисодий ҳамкорлик жиҳатидан энг истиқболли глобал ҳудудлардан бири сифатида Яқин Шарқ ва Кўрфаз минтақаси кўрилмоқда.
Шунингдек, Хитой ҳамда глобал қарорларга таъсир ўтказа оладиган ва Россиянинг Украинага қарши урушини тугатишга кўпроқ кўмак бериши мумкин бўлган асосий халқаро ташкилотлар билан ишлаш ҳам тилга олинди.
«Ички ишларда ҳам худди шундай тамойил амал қилади», — деди Зеленский. «Ҳозир янги муаммо ва вазифалар рўпарасида турибмиз. Ҳар куни фронтолди ва чегараолди вилоятларимиз Россия зарбаларига учрамоқда. У ерлардаги ишларни сезиларли даражада кучайтириш талаб этилади. Армиямизга зарур қурол-яроғ ва дронларнинг барча турларини етказиб бериш ҳажми ортишини кутмоқдаман», — деб қўшимча қилди президент.
Унинг таъкидлашича, қишга тайёргарлик кўриш ҳам муҳим йўналиш. Мамлакат барқарорлиги кўп жиҳатдан боғлиқ бўлган давлат компанияларининг трансформациясини тезлаштириш лозим, деди у.
«Шу боис янгиланган сиёсий стратегияни таъминлаш мақсадида мамлакатда кадрлар ўзгариши бошланади. Биз бунинг тафсилотларини Украина бош вазири Юлия Свириденко билан муҳокама қилдик. Ўзгаришлар учун Вазирлар Маҳкамасини янгилаш зарур деган қарорга келдик. Юлияга бош вазир лавозимидаги аниқ, барқарор ва самарали фаолияти, Украина жамоасидаги кўп йиллик натижали меҳнати учун миннатдорлик билдирдим ҳамда унга асосий шерикларимиздан бири билан муносабатлардаги янги муҳим йўналишга раҳбарлик қилишни таклиф этдим», — дея тушунтирди Украина президенти. Бош вазирнинг истеъфоси Украина Вазирлар Маҳкамасининг барча аъзолари ўз лавозимларини тарк этишини англатади.
Шунингдек, ҳуқуқ-тартибот органлари раҳбарлари таркибида ҳам ўзгаришлар бўлиши айтиб ўтилди.
Юлия Свириденко 2025 йил июль ойида Украина бош вазири лавозимини эгаллаганди. Ушбу лавозимга тайинланишидан олдин у Украина бош вазирининг биринчи ўринбосари — иқтисодиёт вазири (2021 йил 4 ноябрдан) бўлиб ишлаган. Свириденко бош вазир лавозимига 2020 йил март ойидан буён Вазирлар Маҳкамасини бошқариб келган Денис Шмигалнинг ўрнига келган. Шмигаль Украина мудофаа вазири этиб тайинланганди. Бироқ 2026 йил январдаёқ Шмигаль мудофаа вазири лавозимини тарк этган ва бош вазир ўринбосари — Украина энергетика вазирига айланган. «Униан»нинг ёзишича, Украина ОАВлари Шмигалнинг бош вазир лавозимига қайтишини истисно қилмаяпти.