«Равшан Золотой» номи билан танилган Равшан Муҳитдиновнинг оммавий карточкаси июнь ойи бошида Халқаро жиноий полиция ташкилоти (Интерпол) веб сайтидаги қидирувдаги шахслар базасида кўрсатилмай қўйди.
Олдин мавжуд бўлган Red Notice («қизил билдиришнома») ҳаволасига ўтилганда Интерпол сайти ушбу сўров бўйича натижалар йўқлигини кўрсатади.
Апрель ойида Gazeta Ўзбекистон ҳуқуқ-тартибот идоралари 37 ёшли Ўзбекистон фуқароси Равшан Муҳитдиновни Интерпол орқали халқаро қидирувга берганини хабар қилганди.
У Жиноят кодексининг 173-моддаси 3-қисми (Мулкни қасддан нобуд қилиш ёки унга зарар етказиш — 3 йилдан 5 йилгача озодликни чеклаш ёки озодликдан маҳрум қилиш билан жазоланади), 242-моддаси 2-қисми (Уюшган қуролли гуруҳ тузиш, шунингдек, унга раҳбарлик қилиш ёки унда иштирок этиш — 10 йилдан 15 йилгача озодликдан маҳрум қилиш билан жазоланади) ва 277-моддаси 3-қисми (Безорилик — 3 йилдан 5 йилгача озодликни чеклаш ёки озодликдан маҳрум қилиш билан жазоланади)да назарда тутилган жиноятларни содир этганликда айбланган.
14 июль куни Ички ишлар вазирлигида бўлиб ўтган матбуот анжуманида Тошкент шаҳри ИИББ бошлиғи ўринбосари Дилмурод Мирсодиқов қидирув нега тўхтатилганини тушунтирди, дея хабар берди Gazeta мухбири.
Унинг сўзларига кўра, жиноят иши 2021 йилда қўзғатилган, шундан сўнг Равшан Муҳитдиновга тегишли моддалар билан қидирув эълон қилинган.
«Кейин вақт ўтиши билан жавобгарликка тортиш муддати ва процессуал муддатлар тугагани сабабли жиноят иши тўхтатилиб, унга нисбатан ишнинг бир қисми тугатилган», — дейди ИИББ вакили.
Кейинчалик бир қатор тергов ҳаракатлари ўтказилиб, янги ариза ва маълумотлар келиб тушгач, тергов яна фаоллашган.
«Барча тергов ҳаракатлари ўтказилгандан сўнг унга нисбатан қўйилган бошқа айбловлар ва ҳолатлар ўз тасдиғини топмади. Унга нисбатан тергов ҳаракатлари яна тўхтатилди», — дейди Дилмурод Мирсодиқов.
Равшан Муҳитдиновнинг ўзи Facebook’даги постида «19 йиллик қувғиндан сўнг» унга қарши барча айбловлар олиб ташлангани ва «тарихий ватанига йўл очилганини» айтди.
«Бундан кейин ҳам Аллоҳ таолонинг изни билан ўз Ватанимга, байроғимизга, динимизга хизмат қилишда давом этаман, халқимга содиқ фарзанд бўлиб қоламан», деб ёзади у.
Маълумот учун, Равшан Муҳитдинов Туркияда яшайди ва тадбиркорлик билан шуғулланади. У шунингдек, Истанбулда рўйхатдан ўтган Dünya Engelliler Vakfı (DEV, Бутунжаҳон ногиронлиги бўлган инсонлар фонди) ташкилотининг молиявий масалалар бўйича вице президенти ҳисобланади.