Тошкент туманлараро иқтисодий суди Rayyan Kids Group хусусий боғчасининг (юридик номи — Rayyan Kids Land) лицензиясини бекор қилди. Июль ойи бошида тарбиячининг болаларга нисбатан шафқатсиз муносабати акс этган видео эълон қилинганидан кейин ушбу боғча атрофида можаро келиб чиққанди. Бу ҳақда Тошкент шаҳри судлари матбуот хизмати хабар берди.
Суд Мактабгача ва мактаб таълими вазирлигининг Rayyan Kids Land оилавий корхонасига нисбатан лицензияни бекор қилиш тарзидаги ҳуқуқий таъсир чорасини қўллаш тўғрисидаги даъво аризасини кўриб чиқди.
Кўриб чиқиш натижаларига кўра, суд ташкилотга 2025 йил 13 августда берилган нодавлат таълим хизматларини кўрсатиш бўйича лицензияни бекор қилди.
Раислик қилувчи судья, шунингдек, қарорнинг мазмун-моҳиятини, унинг устидан шикоят қилиш муддатлари ва тартибини тушунтирди.
Тошкентдаги хусусий боғчадан олинган видеонинг ижтимоий тармоқларда тарқалиши ортидан юзага келган резонанс ушбу ишни кўриб чиқишга асос бўлди. Кадрларда тарбиячи бир боланинг оғзига мато тиқаётгани, бошқа бир боланинг қўлини эса эшикка қисиб қўйгани акс этган.
Видео эълон қилинганидан кейин Мактабгача ва мактаб таълими вазирлиги вазиятни назоратга олганини ва ҳуқуқ-тартибот идоралари вакиллари иштирокида ишчи гуруҳ тузилганини маълум қилди.
Тошкент шаҳри ИИББ 36 ёшли тарбиячи тарбияланувчиларга нисбатан тизимли равишда жисмоний куч ишлатиб, уларга шафқатсиз муносабатда бўлганини хабар қилган. Болаларга етказилган тан жароҳатлари даражасини аниқлаш мақсадида суд-тиббий экспертизаси тайинланган.
Учтепа тумани ИИО ФМБ ҳузуридаги тергов бўлими томонидан Жиноят кодексининг 110-моддаси (Қийнаш) бўйича жиноят иши қўзғатилган. Текширув, шунингдек, Учтепа тумани ҳокимлиги томонидан ҳам олиб борилган.
Рўйхатдан ўтиш маълумотларига кўра, Rayyan Kids Land оилавий корхонаси 2024 йил 21 октябрда 5 миллион сўмлик устав фонди билан ташкил этилган. Ташкилот раҳбари сифатида Шоҳрух Қодиров кўрсатилган.
Муассислар Мухлиса Патхуллаева ва Шуҳратилла Патхуллаев бўлиб, уларнинг ҳар бирига корхонанинг 50 фоизли улуши тегишли.
Шоҳрух Қодиров, шунингдек, дам олиш ва кўнгилочар соҳада хизмат кўрсатувчи New Pro Club Business компаниясида 100 фоизли улушга эга ҳамда фаолияти меҳмонхоналар ва шунга ўхшаш жойлаштириш воситалари билан боғлиқ бўлган Sunny Mont Blank корхонасига раҳбарлик қилади.